1992 жылы ресми түрде, яғни тарихи заңдар арқылы қабылданған, барша қазақстандықтың мақтанышына айналған мемлекеттік рәміздеріміздің бүгінде жанымызға жылылық ұялата білер тарихы қалыптасты. Рәміздеріміздің тарихына, мазмұнына зер салсаңыз тәуелсіз еліміздің бейбітшілікке, достыққа негізделген ұстанымын, саясатын анық аңғарасыз.
Өзім Амангелді ауданына қарасты Амантоғай ауылының тумасымын. Қазақы ауылда өсіп, қазақ мектебінде білім алғандықтан, жастайымнан Әнұранымызды жаттап, Елтаңбамыздың әр өрнегін зерделеп, болашақ арман-қиялын мемлекеттік Туымызбен астастырған жастардың бірімін. Биыл Қостанай гуманитарлық колледжін мектепке дейінгі тәрбие және оқыту мамандығы бойынша тәмамдап жатырмын. 2018 жылы Мемлекеттік рәміздер күніне орай ұйымдастырылған «Мемлекеттік рәміздер – мақтанышым» атты облыстық байқаудың жеңімпазымын.
Халқымыз өз ұрпағына Отанын, жерін, тілін, мемлекеттік рәміздерін жүрекпен сүюге, патриот болуға тәрбиелеген және баулыған. Біздің мемлекеттік рәміздеріміздің мазмұны өте терең, зор тәрбиелік мән-мағынасы бар. Олардың еліміздің өткені мен болашағын, мақсат-мүддесін, берік ұстанымын айқындайтынын ескере сөйлесек, әрбір отандасымыз Қазақстан Республикасының мемлекеттік рәміздерін құрметтеп, қадірлеп, мақтаныш етуі керек.
Біз балабақшаларға жиі барып, тәжірибеден өтіп тұрамыз. Өсіп келе жатқан балдырғандарға мемлекеттік рәміздеріміз туралы әңгімелеп, оларды қастерлеуге үйретіп, отансүйгіштікке тәрбиелейміз.
Осы орайда, Мемлекеттік рәміздер күні мән-маңызы жоғары, бабалар аманатын арқалаған бүгінгі ұрпаққа зор жауапкершілік артатын аса мәртебелі мейрам екенін атап өткім келеді. Өмірден ерте кеткен талантты айтыскер ақын Оразалы Досбосыновтың «Аспаннан алты құлаш жыртып алып, қолына көк байрақ қып ұстаған жұрт», деген сөзі есімде жатталып қалыпты. Бұл тегін айтылған сөз емес. Көк – тазалық пен асқақтықтың белгісі. Көңіліміз таза, арманымыз асқақ болсын деген ниетпен, барша қазақстандықты 4 маусым – Қазақстан Республикасының Мемлекеттік рәміздері күнімен шын жүректен құттықтаймын! Әрдайым аспанымыз ашық, еліміз тыныш, халқымыз аман, мәртебеміз биік болсын! Рәміздер күні құтты да, берекелі болып, еліміз бірлік пен ынтымақты ту етіп, биіктерді бағындыра берсін!
Оксана ТЕРЕНТЬЕВА,
Қостанай Гуманитарлық колледжінің студенті
Қостанай облысы
