Даулы ролик сабақ бола ма?

Қоғам • 08 Маусым, 2020

Даулы ролик сабақ бола ма?

390 рет көрсетілді

Әлеуметтік желідегі жұртқа бірнеше күннен бері азық болып тұрған тақырып – Шымкенттегі Жастар ресурстар орталығы шығарған бейнеролик. Талқылауға араласпаған адам кемде-кем десек артық айтпаспыз.

Арнұр АСҚАР

Желіге тіркелген, қолында смартфоны бар жұрттың біразы хабардар болғандықтан, даулы роликтің мазмұнын айтып жатпайық. Жалпы, жұрт онда насихатталған дүниені қолдайтындар мен қолдамайтындар болып екіге жарылды. Бейжай қарап отырғандар да бар, әрине. Қысқасы, бірнеше күннен бері оған әр түрлі қырынан үңіліп жатыр жұрт.

Қолдайтындардың пайымын түйіндеп айтсақ, дініміз бен діліміздегі ұстаным бойынша қазақ қыздары етегі шолтиған «юбка» кимегені жөн, осындай роликтерді көбірек шығару керек дегенге саяды. Қарсылар зайырлы қоғамда кім қалай киінсе де өз еркі дейді. Олардың пікірінше, қыз баланы көлігіне мінгізіп алып, киім киісіне сынауға, ақыл айтып мораль оқуға көлденең көк аттылардың ешқандай құқы жоқ.

Бейнероликтің бюджет қаражатына түсірілгені де дауды одан сайын ушықтырды. Factcheck.kz-тің хабарлауынша, Шымкенттегі ЖРО бұл бейнероликті нақты қанша теңгеге түсіргенін анықтау қиын. «...Себебі тендер ережесі бойынша орындаушы (жеткізуші) 5 ролик түсіруі керек. Жалпылама түрде 6,2 млн-ды ролик санына бөле салуға болады, бірақ бұл нақты бағаны бермейді. Әуелде тендерге 8 млн теңге бөлінген. Жеткізуші – «Таласов Серик Туребекович» ЖК қызметіне ең аз соманы, яғни 6,2 млн теңге ұсынып тендерді жеңіп алды. Келісімшарт жылдың соңына дейін жасалған, жеткізуші қызметті биыл 3 қазанға дейін орындауы керек. Қазір 6,2 млн теңгенің 3 млн-ы жұмсалған. Қанша бейнеролик түсірілгені белгісіз».

Белгілі заңгер Джохар Утебековтің айтуынша, бейнероликтің мазмұнынан заңға қайшы дүниелерді насихаттау байқалады. Заңгер бейтаныс еркектің қыз баланы көлігіне отырғызып, есігін жауып алғаны, киіміне қарап жезөкшеге теңегенін «ұсақ бұзақылық әрекет» деп бағалады, жолаушыға моральдық зиян шектірді деген пікір білдірді.

Жалпы, нәзік жандылардың ашуын тудырған, қоғамның басқа да мүшелерінің қарсылығына тап болған болған пікір иелері соңғы уақытта жиілегені белгілі. Соған қарай отырып, бірнеше қорытынды жасауға болатын сыңайлы. Қазіргі қоғам бұрынғыдай басқалардың көңіліне қарамай пікір айтатындарды көтермейді, өзімен санасуға мәжбүрлейді. Санаспаса, қоғам оны жазалауы да мүмкін. Бұл – бір.

Екіншіден, қоғамдағы кемшіліктерді бәз-баяғы әдіспен құрғақ ақыл айту арқылы түзейтін әдіс ескірді. Халықтың санасына басқа тереңдеу, жан-жақты зерттелген тәсілмен ғана әсер етудің жолдарын қарастырған жөн. Айтпақшы халықтың бюджет қаржысының қалай жұмсалғанына алаңдаушылығы күшейгенін де осы оқиға көрсетті. Бір анығы, жастарды таптаурын сценарийге құрылған бейнероликпен, құрғақ ақылмен тәрбиелеу мүмкін емес. Мұндай ролик бір тараптың ашу-ызасын туғызады, тіпті ерегестіруі де мүмкін. Ал екінші тараптың айызын қандырады. Қоғамның жақ-жаққа бөлініп қырылғаны емес, басқа нәтиже, нақты пайдалы нәтиже шыққанын қаласақ, мәселеге басқа қырынан үңіліп көрген жөн болар.

Күннің маңызды және өзекті жаңалықтарын «Егемен Қазақстан» телеграм каналынан оқыңыз