Аймақтар • 10 Маусым, 2020

Итбалықтардың әрекеті түсініксіз болып тұр

985 рет көрсетілді

Жаз басталып, карантиннің құрсауынан босаңсыған теңіз жағалауының тұрғындары айдынға барып құрыс-тырысын жаза құлаштай жүзіп, рахаттана демалуды бастап кетті.

Алайда Түпқараған ауда­нында болған тосын жайт тұр­ғындарды тосылтып әрі та­ңырқатып қойды.

Теңізге демалуға барған бес адамды – үлкені 1999 жы­лы туған жігіт пен ең кішісі 2013 жылы туған балаларды итбалықтар тістеп алған.

Түпқараған аудандық ауру­­ханасының қабылдау бө­ліміне екі баланы жедел меди­циналық жәрдем бригадасы жеткізсе, қалған үшеуі өздері ба­рып дәрігерлерге қара­ла­ды. Дәрігерлер балаларда сол білек пен оң жақ білектің тіс­­теуін анықтады. Кіш­кен­тай науқастарға алғашқы хи­рур­­гиялық өңдеулер мен­ құтырмаға қарсы вак­цина егілген, одан кейін олар үйлеріне қай­тарыл­ған. Ауруханаға жат­қызу қа­жет­­ті­лігі болмаған.

Алдағы уақытта меди­ци­налық көмектің қажеттілігі бол­са, мекенжайы бойынша жал­­пы тәжірибелік дәрігерді үйге шақыртып, әрі қарай ем-дом шараларын алады. Ал ме­ди­цина қызметкерлері оқи­ғаға орай суға шомылу мау­сы­мы кезінде сақтық шарала­рына көбірек көңіл бөлуге шақыруда.

Итбалық – момын сипатты жануар. Көнекөздер де, эколог мамандар да олардың адамға шабуылдауын бұрын-соңды естімегендіктерін айтады.

– Итбалықтар адамға тиіс­пейді, керісінше алыстан көрген сәтте қашады. Дегенмен бала кезімде үлкендер «теңізге адам бар жерден түсіңдер, әйт­песе итбалық тістеп алады» дейтін. Биолог маман ретінде айтарым – итбалықтар адамға екі жағдайда шабуыл жасауы мүмкін. Бі­ріншісі – қорқу сезімі әлі қа­лыптаспаған жас итбалықтар ойнау мақсатында тістеуі мүм­кін, екіншісі – құ­­тыр­ма сияқты ауруға шал­дық­қан жан­уарлар болуы мүм­­кін, ал оларда қорқу се­зімі мүлде болмайтыны тү­сінікті. Сондықтан теңізге түс­кенде итбалық көрсеңіз ұя­лы телефонға суретке түсіру сынды қызығушылықпен оған жақындауға болмайды, тезірек жағаға шығып, алыс­тан бақылап, қызықтаған жөн. Егер тістеп алған жағдайда дер кезінде дәрігерлік қыз­мет­ке жүгінген абзал. Сон­дай-ақ итба­лықтарды аш­тық­тан шабуылдады деуге кел­мей­ді, себебі олар судағы ба­лық­тармен қоректенеді, – дейді эко-амбас­садор, «Табиғи орта» Батыс Қазақстан үкі­мет­тік емес ұйымдары өңір­лік ас­социа­ция­сының ке­ңес төрағасы Әділ­бек Қозы­бақов мәселеге орай пікірлескенімізде.

Қақаған қыста – ақпан айында сарышаян шаққан маң­ғыстаулықтар енді итба­лықтардың адамға шабуылдауын түсіне алмай отыр...

 

Маңғыстау облысы

 

 

Соңғы жаңалықтар

Шәміл

Тарих • Кеше

ZOOM акциялары қымбаттады

Технология • Кеше

Ұқсас жаңалықтар