Ержан екінші ауысымдағы жұмысына келе жатып, жолда адамдардың жиналып тұрғанын байқап, тоқтайды. Бұл кезде алда кетіп бара жатқан полиция көлігі де тежегішін басады.
Полиция қызметкерлері бірден ТЖ қызметін шақырады. Ал Ержан су құбыры құдығынан ыңырсып жатқан дауыстарды естиді. Жақындап келіп қарағанда ішінде шығуға дәрменсіз, есінен айырылып жатқан екі жігітті көреді. Ержан Әбдіразақов ойланып жатпастан ақ көйлегін шешіп, жанында тұрған әйелдің орамалын дымқылдап, мұрнына байлап, құдыққа түседі. Оған Аманжол Жансейітов деген азамат көмектеседі. Екеулеп жүріп ес-түссіз жатқан азаматтарды құдықтан шығарады. Жедел жәрдем келіп, алғашқы дәрігерлік көмек көрсетіп, әрі қарай ауруханаға алып кетеді.
Сонымен кәріз құдығынан аман қалған "Алматы су" мекемесінің қызметкерлерініңі бірі ауруханадан шықты. Қалқамандағы №7 ауруханадан аман-есен айыққан 25 жастағы Нұржанды шығарып алушылар қатарында оның құтқарушысы, ХҚО қызметкері Ержан Әбдіразақов та болды.
Ержан өзі құтқарған жігіттердің халін біліп, ауруханаға барып тұрған. Жансақтау бөлімінде жатқан жігіттерге жібермесе де, туыстары, аурухана дәрігерлері арқылы жағдайларын біліп отырыпты. Нұржан аман-есен ауруханадан шыққанда да жанынан табылды.
Ажалдан аман қалған Нұржан өзінің құтқарушысы Ержан ағасына ағынан жарыла алғысын білдіре отырып: "Мен ол күнді екінші туған күнім десем болады. Өліп қайта тірілгендеймін. Осы сәтте Ержан сынды батыл ағамыз болмағанда, о дүниелік болар едік. Бізге екінші өмір сыйлаған ағаларыма Алла ризашылығы үшін шын жүректен алғысымды білдіремін", – дейді Нұржан.
Ал, екінші жігіт – Асқар Қайназаров әлі де ауруханада жатыр. Ол да есін жиған, сөйлей алады. Бірақ ауруханадан шығуға ерте, әлі де әлсіз. Оны да көруге Ержан бірнеше рет барған, бірақ палатаға жібермейді. Сондықтан оның бауыры Ысқақ арқылы хал-жағдайын біліп тұрады.
"Азаматтарымыз аман болса екен. Асқардың да тез айығып, қатарға қосылуын тілеймін. Нұржан ауруханадан шыққанда қатты қуандым. Туыстары, әріптестері келіп, бәріміз бірге қуанып, шығарып алдық. Енді Асқарды да осылай қуанышпен шығарып алатын күн тез жақындасын. Бәріміз де оның денсаулығы үшін дұғада отырмыз", – дейді Ержан.
Сын сағатта еш ойланбастан, өз өмірінің қаупіне қарамай, құтқаруға ұмтылған Ержан Әбдіразақовтың ісі үлкен ерлік, асқан адамгершілік, дейді ұжымдастары мақтанышпен.
Алматы
