Қатерлі дерттен сақтаған, халық сенімін ақтаған

Қоғам • 11 Маусым, 2020

Қатерлі дерттен сақтаған, халық сенімін ақтаған

47 рет көрсетілді

Адамзат баласы үшін бағзы заманнан бергі басты байлық – мықты денсаулық. Бұрын басы ауырып, балтыры сыздаса, халық емшілерінің көмегіне жүгінетін, қазір медицинаның қарыштап, қарқындап дамыған заманында білікті дәрігерлерге арқа сүйейді. Адам жанының арашасы саналар ақ халаттылар мамандығы – жылдар жылжып өтсе де замана көшінен қалмай, қоғамнан ойып орын алатын, әрдайым жоғары сұранысқа ие, өз биігін сақтап қалар мерейі үстем мамандық.

Egemen Qazaqstan

Науқасқа тіршілік нәрін сыйлап, көңілінен күдікті арылтып, көзіне үміт отын жағатын, қайғысын азайтып, қуанышын арттыратын да осы абзал жандар. Дәрігерлердің дамылсыз жұмысын, науқастың өмірін сақтап қалу жолындағы өлшеусіз еңбегін бір кісідей білемін десем, артық айтқандық болмас. Оған себеп, өмірлік серігім, марқұм Төлеухан Тұрысбекұлы да осы салада жоғары санатты хирург-дәрігер болып, қырық жылға жуық абыройлы қызмет етті. Жолдасым әр сырқаттың сырын ұғынып, жанына терең үңіліп, жылы сөзін аямай, мейлінше мейірімін төге білді. Мамандығына деген махаббатының, адамдарға деген ақ адалдығының арқасында өз ортасында сыйлы, беделді болды.

Әлем жұртшылығын әлекке салып, шартарапты шарпыған коронавирус індеті біздің елімізді де сырт айналып өткен жоқ. Аспанасты елінен бастау алған ауру азуын айға білеген АҚШ, Италия, Испания, Иран, Ресей секілді медицинасы мықты деген елдердің өзін есеңгіретіп, сарсаңға салды. Бір мезетте жүздеген, мыңдаған адам мәйітке айналды. Ел басына күн туған елең-алаң шақта етігімен су кешкендер, яғни медицина мамандары мен тәртіп сақшылары жағдайды қалыпта ұстау үшін қызметтерін қалтқысыз атқарып жатқандықтарын айрықша атап өткеніміз жөн. Түн баласы кірпік қақпай, індетпен алысып, жанын сала жұмыс жасағандықтың нәтижесі болар, адам шығыны азайып, аурудан айыққандар саны артуда. Елімізде аты жаман аурудың алдын алып, қауіпсіздік шараларын қатаң сақтау мақсатында карантин енгізіліп, көптеген мекеме жұмысын тоқтатты. Байыппен бағамдап, батыл қадамдар жасайтын басшымыз Қасым-Жомарт Кемелұлы Тоқаев табысынан айырылған жандарға төменгі жалақы мөлшерінде әлеуметтік көмек тағайындады және жұмыс жүйелі жүріп жатыр. Мұны Президентіміздің қиын-қыстау шақта қанатымен су сепкен қарлығаштай халыққа көрсеткен зор қолдауы әрі қамқорлығы деп білемін. Сондай-ақ міндеттерін мүлтіксіз орындап жатқан медицина қызметкерлеріне мемлекет тарапынан сыйақы ретінде қомақты сома бөлінді. Бұл да болса, басын қатерге тіккен бүгінгі күн батырларының бағаланғаны, маңдай тер мен ерен еңбектің еленгені емес пе?! Шыбын жанын шүберекке түйген әрбір адамның амандығы үшін ажалмен алысып, отбасынан жырақтап, емхананы екінші үйі еткен ақ халаттыларымызды қалай ардақтасақ та аз болар...

«Бұлыңғыр күннің артынан бұлтты түре күн шығар» дегендей, келер күндерден күтер үмітіміз мол. Бір жағадан бас, бір жеңнен қол шығарып, бірлігімізді бекем етсек, еліміз еңсені езген індетті еңсеріп, көптен көксеген көңілді кездерімізбен қайта қауышарымыз хақ.

18 маусым – еліміздегі денсаулық сақтау саласы мамандарының төл мерекесі. Осындай сындарлы сәттерде сыр білдірмей, ұнжырғаларын түсірмей, ұлтымыздың тағдырына ұқыптылықпен қарап, ұстамдылық таныта ұлы мұраттарды орындап жүрген ел дәрігерлерін мерейлі мерекелерімен шын жүректен құттықтаймын. Маңдайалды мақтаныштарымызға мықты денсаулық, темірдей төзім, жұмыстарына телегей табыс тілей отырып, қалың елі қазағының ыстық ықыласы мен шексіз ризашылығына бөленсін деген ниетпен өзімнің аналық алғысымды білдіремін.

Ғалия БЕРТІСҚАНОВА,

еңбек ардагері

Күннің маңызды және өзекті жаңалықтарын «Егемен Қазақстан» телеграм каналынан оқыңыз