![Бізде жеңіске деген құлшыныс жоғары](/media/2020/06/12/14.jpg)
– Қазіргі қазақстандық кәсіпқой боксшылардың нәтижелеріне көңіліңіз тола ма?
– Иә, көңілім толады. Керемет. Көбі өз күштерімен шыңға шығуда. Қазақстанның қолдауынсыз.
– Кәсіпқой бокстан еліміздің ең үздік он боксшыны атасаңыз.
– Мен олар үшін қуаныштымын. Мына боксшыларды атап өтсем: 1. Геннадий Головкин (40-1-1); 2. Қанат Ислам (27-0-21); 3. Жанкош Тұраров (24-0-17); 4. Бейбіт Шүменов (20-2-18); 5. Батыр Жүкембаев (18-0-14); 6. Әли Ахмедов (16-0-12); 7. Бахтияр Эюбов (14-1-2); 8. Мейірім Нұрсұлтанов (13-0-8); 9. Бекман Сойлыбаев (12-0-4); 10. Руслан Мадиев (12-1-5).
– Сізге Қазақстан атынан ұсыныс жолданып, кәсіпқой боксшыларды дайындауға шақырса, қабыл аласыз ба?
– Әрине егер менің де ұсыныстарым ескерілсе, Қазақстанда жаттықтырушы болуға қуана келісер едім.
– Көптеген боксшы сізбен кездесуден бас тартты. Солардың ішінде Рой Джонс, Майк Тайсон, Эвендер Холлифилд бар. Тағы да кімдерді атар едіңіз?
– Иә, көптеген боксшы менімен кездесуден бас тартатын. Жекпе-жекке екі сағат қалғанда, екі боксшыдан төрт боксшыға дейін ауысып кететін. Кешіріңіз, бірақ қазір олардың есімдері есімде жоқ.
– «Балқаш жолбарысы» деген лақап атты не себепті таңдадыңыз?
– Біле білсеңіз, мен Балқаш қаласында туып-өстім. Бұрын сол Балқашта жолбарыстар өмір сүрген дейді. Қазір олар жойылып кеткен. Бір жазушы мен жайлы жазған кезде менің рингтегі қимыл-қозғалысымды жолбарысқа теңеген екен. Сол уақытта мен өзіме лақап ат қарастырып жүргенмін. Осы лақапты өзіме лайық көріп «Балқаш жолбарысы» деп атадым.
– Қазір немен айналысасыз?
– Қазір жаттықтырушымын. Әуесқой боксшыларды, өзі үшін бокспен айналысқысы келетін, денсаулығын нығайтқысы келетін жандарды жаттықтырамын.
– Шаршы алаңды сағынбайсыз ба?
– Сағынып жүрмін деп айта алмаймын. Бокстан кетерде жан-жақты ойланып, барлығын есептеп кеткенмін.
– Өзіңіз туралы тағы не айтар едіңіз?
– Өмір жалғасып жатыр, яғни тірі адам тіршілігін жасайды... Жеке отбасым жайлы мәлімет бере алмаймын. Ол тек өзіме ғана тиесілі дүние.
– Салыстырмалы түрде қазақстандық және америкалық боксшылардың айырмашылығы қандай?
– Америкалық боксшыларда айтарлықтай жігер жоқ, бірақ есептері мықты. Ал қазақстандық боксшыларда жеңіске деген құлшыныс өте жоғары.
Әңгімелескен
Айбек МҰҚАНОВ,
журналист,
арнайы «Egemen Qazaqstan» үшін