Агенттіктің хабарлауынша, бүгінгі таңда екінші деңгейдегі банктер мен ипотекалық ұйымдар 256,7 млрд теңге сомаға 37 191 ипотекалық қарызды қайта қаржыландыруды мақұлдаған. Бағдарлама бірнеше блоктан тұрады. Ипотекалық қарызды қайта қаржыландыру бағдарламасы борышкерлердің жалғыз баспанасын сақтауға, борыш жүктемесін төмендетуге және оларды валюта бағамдарының құбылуынан қорғауға бағытталғанын айта кетейік.
2004-2009 жылдары бағдарламаның бірінші блогында Ұлттық банк борышкерлердің берешегін жеңілдету үшін 130 млрд теңге бөлді. Ол қаржыны банктер игерді. Ендігі кезекте қайта қаржыландыру бұған дейін қарыздарды өтеуден түскен ақша есебінен жүзеге асырылуда. Қазір жалпы көлемі 174,7 млрд теңгені құрайтын 28 117 өтініш мақұлданды, 161 млрд теңгені құрайтын 27 006 қарыз қайта қаржыландырылды.
Бағдарламаның екінші блогында 2016 жылғы 1 қаңтарға дейін алынған жеке тұлғалардың валюталық ипотекалық қарыздарын Ұлттық банк 2015 жылғы 18 тамыздағы теңге бағамы бойынша теңгемен қайта қаржыландырмақ. 1 маусымдағы жағдай бойынша 82 млрд теңге сомаға 9 074 өтініш мақұлданып, 68,4 млрд теңгенің 7 750 валюталық ипотекалық қарызы қайта қаржыландырылды.
Биылғы қаңтар айынан бастап Қаржы нарығын реттеу және дамыту агенттігі халықтың әлеуметтік осал топтары санатына жататын қарыз алушылардың ипотекалық жүктемесін төмендетуге, сондай-ақ азаматтардың жалғыз баспанасын банктің балансынан кепіл берушінің меншігіне қайтаруға бағытталған қосымша шараларды енгізгенін атап өткен ләзім. Бұл бағдарламаның үшінші блогы шеңберінде атқарылған жұмыс.
Валюталық ипотекалық қарыздарды қайта қаржыландыру мерзімі 2020 жылғы 31 желтоқсанға дейін ұзартылды. Қарыздың бағдарлама талаптарына сәйкестігін анықтау үшін азаматтар кредитор-банкке жүгінуі қажет.
Агенттік банктерге бақылау жүргізеді, еліміздің барлық өңірлерінде банктің қарызды қайта қаржыландырудан бас тартуының заңдылығы туралы қарыз алушылардың шағымдарын қарайтын арнайы комиссиялар құрылған. 2020 жылғы 1 маусымдағы жағдай бойынша комиссиялар қарыз алушылардың 5 094 шағымын қарады. Қоғамдық бірлестіктердің өкілдері өз кезегінде комиссиялардың өкілеттіктерін кеңейтуді және екінші деңгейдегі банктердің ипотекалық қарыздар бойынша өтініштерді қарау мерзімін жеделдетуді ұсынды.
