Түп-төркінінде елдік мүдде тұр

Саясат • 18 Маусым, 2020

Түп-төркінінде елдік мүдде тұр

24 рет көрсетілді

Төрткүл дүниені түгелдей дерлік жайлаған COVID-19 індеті қанша жерден алқымнан алғанымен әлемдік және елдік даму үдерісіндегі жаңғыруларға тұсау сала алмайтыны белгілі болып отыр. Қазіргі күнге дейін оның алдыңғы қатарында әлеуметтік-экономикалық тұрғыдағы өрелі өзгерістер тұрған болса, соңғы уақытта бұған қоса саяси-қоғамдық сипаттағы бетбұрыстар да көзге айқын көрінуде.

Темір ҚҰСАЙЫН

Атап айтқанда, Nur Otan партиясы бүгінгі уақыт пен замана тынысын дөп басып, алдына айқын да байыпты бағдар белгілеп отыр. Соның ішінде елдің көшбасшы саяси ұйымы өзге әріптестері мен қоғамдық институттарға үлгі-өнеге және бастамашылдық танытып, елдік мүдде мен елдік мәселелер төңірегінде ұтымды партиялық жобаларды қолға ала білгені – құптарлық іс. Партияның Ойыл ауданындағы Саяси кеңесі бюросының мүшесі, Ойыл аудандық мәслихатының хатшысы Еркін Жиеналин өз-ой пікірін осы арнадан сабақтады.

Оның айтуынша, Батыстан бастау алған, бұдан кейінгі кезеңде АҚШ саясаткерлерінің демократиялық ұстанымдарына негізделген сайлау тәжірибесін жатсынудың қажеті жоқ. Тіпті Парламент Мәжілісінің депутаты Бақытбек Смағұл «Egemen Qazaqstan» газетінің 9 маусым күнгі нөмірінде жарияланған «Праймериз – пайым мен парасат өлшемі» деген мақаласында бұл – партияның әр өңірде өткізетін ішкі сайлауы деген ұғымды білдіретінін айта келіп, праймериз – халқымыздың байырғы дәстүрін жаңа форматта қайта түлету іспетті екенін атап көрсетіпті.

Әңгімені әрі қарай жалғасақ, әлем елдерінің саяси лексиконынан өз орнын тапқан праймериз терминін халқымыздың ойлау-түсінігіндегі ұғымға сайсақ, партияішілік іріктеу тәсілі болып шығады. Жаңа тәсіл партияішілік сайлаудың мазмұны мен түріне, бүгінгі тілмен айтқанда, оның форматына түбегейлі өзгерістер енгізілуіне әрі ең лайықты көшбасшыны сайлауға септігін тигізбек. Екіншіден, мұның өзі еліміздің саяси қондырғысына әлемдік тәжірибеде өзін өзі толығымен ақтаған жаңа технологиялар мен тәсілдердің енгізілу үрдісін таныта алады.

– Халықаралық деңгейдегі озық тәжірибенің бәрін бас-көзге қарамай қабылдай беретін болсақ, саяси сынақтан сүрініп кетуіміз де әбден мүмкін. Осы орайда Nur Otan партиясы праймериз тәсілінің тиімді тұстарын алдын ала ой таразысынан өткізгені партия мүшелері мен көпшілік тарапынан қолдау тапқаны – бір мерей. Тек содан кейін ғана өткен жылы партияішілік іріктеу тәсілі қанатқақты жоба режімінде ұйымдастырылды. Оның өңірдегі жиыны Ақтөбе облысы бойынша Мұғалжар ауданында өткізілді, – деді бұл туралы Nur Otan партиясы Саяси кеңесінің мүшесі, «СНПС-Ақтөбемұнайгаз» АҚ бас директорының бірінші орынбасары Тақталифум Есенғұлов.

Оның негізгі нәтижесі қандай болды деген мәселеге келсек, қанатқақты режім кезінде көптеген адам оған қатысуға ниет білдіргенін айтуға тиіспіз. Әрі осы арқылы нұротандықтардың қатарында жүргендердің арасында кімдердің көшбасшы болуға қабілетті екендігі де анықталды. Осылайша Ақтөбе аймағында праймериз өткізу қызу талқылау мен ашық пікірталастың өзегіне айналып сала берді. Тек содан кейін ғана партияның Саяси кеңесі мүшелерінің дауыс беруімен оның ережесі қабылданды.

Тағы бір атап өтерлік мәселе, алдағы уақытта Ақтөбе облысында партияішілік іріктеуге қатысуға ниет білдіргендерді арнайы әзірліктен өткізу мен оқыту ісі белгіленгені. Сонымен бірге саяси менеджмент мектебінің қызметін жолға қою, сайлаушылармен оңтайлы жұмыс жүргізе білу және көпшілік алдында сөз сөйлеу дағдыларын қалыптастыру, әрі партияішілік мәселелерге қатысты өзге де сұрақтар бойынша онлайн-семинарлар өткізу көзделген.

Праймериздің түп-төркіні тұтастай елдік мүддемен тамырлас екендігі де дәлелдеуді қажет етпейді. Түйіп айтқанда, Nur Otan партиясы қолға алған тың тәсіл саяси ұйымды жаңғырту мен жұмысын одан әрі жетілдірудің бір тұтқасына айнала алатынына сенім білдіргіміз келеді. Осы арқылы еліміздегі жетекші партия демократия қағидаттарына адалдық танытып, саяси реформаны жүзеге асыру үстінде нақты да батыл қадам жасап отыр деуге толық негіз бар.

АҚТӨБЕ