Қордайдағы қираған нысандар қалпына келтірілуде

Аталған оқиға орын алған соң Президент Қордай ауданына арнайы келіп, жергілікті тұрғындармен жүздескен-ді. «Болған қайғылы оқиға артта қалуы тиіс. Алдағы уақытта тату-тәтті, түсіністікте бірге өмір сүреміз. Біз бұдан сабақ алуымыз керек. Бұрын-соңды мұндай жағдай болған емес», деген Президент сөзі де көптің көңіліне демеу болды. Сондай-ақ Қасым-Жомарт Кемелұлы Үкіметтік комиссия барлық нысанды қайта қалпына келтіріп, әлеуметтік мә­се­лелерді шешумен айналысатынын айтқан. Бүгінде Президент та­рапынан берілген тапсырмалар тиісінше орындалуда. Жергілікті тұрғындарға әлеуметтік көмектер көрсетілді.

Ең өкініштісі, Қордай қақты­ғысы кезінде адам шығыны да­ болды. 11 адам қаза тапты. Сонымен қатар ауданның Масанчи, Бұлар- батыр және Ауқатты ауылдарында жаппай төбелес салдарынан 65 нысан өртенді. Соның ішінде 39 тұрғын үй, 20 коммерциялық және 6 шаруашылық нысан бар. Сондай-ақ 47 жеңіл автокөлік, 9 жүк көлігі, 2 трактор және 4 тіркеме, барлығы 62 автокөлікке залал келген. Бір аудан үшін аз шығын емес. Бүгінгі таңда Қордайдағы қираған нысандар қайта қалпына келтірілуде. Түрлі деңгейде зардап шеккен 103 нысанның 71-і демеушілік, 32-сі өз қаражаты есебінен жөн­­­делді. Аталған жұмыстар «Нұр-Ниет» қайырымдылық қо­рына түскен қаражат есе­бінен және кәсіпкерлердің кө­ме­гі­мен атқарылды. Алайда жанып кеткен 65 нысанның 11-і заң­дас­тырылмаған болып шықты. Соның ішінде 8 нысанның құқық белгілеуші құжаттары жоқ болса, 3 нысан салынуы кезінде «қызыл сызық» нормаларын бұзған. Аудан әкімдігінің мәліметінше, осыған байланысты сметаны қайта есептеу жұмыстары жүргізілген. Нәтижесінде, 54 жылжымайтын мүлік нысанын қалпына келтірудің жалпы құны 213 млн теңгені құраған. Нысандарды қалпына келтіру жұмыстарын жүргізуге «Атырау ЖБИ-2005», «ДТА и К» және «Темирстрой» сияқты 3 мердігер компания бекітіліп, сәуір айының сонынан жұмысты бастап кетті. Қазір ауданда қарқынды құрылыс жүргізілуде. «Бүгінде 49 нысанда құрылыс жұмысы басталып, 6 үйдің құрылысы то­лық аяқталды. Құрылыс жұмыстарына бөлінген 213 млн теңгенің 50 млн теңгесі игерілді. Материалдық резервтен жеткілікті көлемде ағаш және профнастил таратылды. Тұрғын үйлері өрттен зардап шеккен 39 отбасына әлеуметтік көмек көрсетуге 20 млн 677,8 мың теңге облыстық шұғыл шығындарға арналған резервтен бөлінді. Жалпы, 36 отбасына 530,2 мың теңгеден барлығы 19087,2 мың теңге төленді», дейді аудан әкімі Рүстем Дәулет.

Бүгінгі таңда «Щивон» қо­ғамдық қайырымдылық қоры құрылып, мұқтаж жандарға 103,9 млн теңгеге қаржылай көмек көрсетілген. Сонымен қатар қайтыс болған 1 азаматтың 960 мың теңге несиесі жабылып, адамдары қайтыс болған дүнген ұлтының отбасыларына 250 мың теңгеден жәрдем берілді. Ал аталған қоғамдық қордан бөлек, қаза тапқандардың отбасына дүнген этномәдени бірлестіктері, Сортөбе мен Қа­ра­кемер ауы­лының тұрғын­дары және Қордай ауданының кәсіпкерлері тарапынан да 4,7 млн теңгеге көмек көрсетілгенін айта кету керек. Президент тапсырмасының не­гі­зінде бүгінде Қордай ауда­нын­дағы қираған нысандар қай­тадан қалпына келіп жатыр.

Шынында да Қордай оқиға­сының қасіреті қара орман халыққа тегіс әсер етті. Әри­не көпшіліктің ойынша өт­кен­нен сабақ алу, қателікті қай­таламау қажет. Қазақ халқы ежелден бейбітшілік пен тату­лықты қастерлеген халық. Сон­дықтан да ұлтымыздың ұлы абыройына сызат түспеуі тиіс. Қасым-Жомарт Тоқаев Қор­дай ауданындағы дүнген диас­порасының өкілдерімен кездескенде: «Сіздердің бала­ларыңыз қазақ тілін үйренуі керек. Сондай-ақ орыс тілі мен өзі­нің ана тілін де бі­луі қажет. Мемлекет сіздер­дің мәде­ниет­теріңіз бен дәстүрлеріңізді сақ­тап, дамытуға жан-жақты қолдау көрсетеді», деген болатын. Бү­гін­гі таңда Президент айтқан жұмыстар жүргізілуде. Қазір Қор­дай ауданында қазақ тілін оқыту курстарының саны артты. Мұнда 565 тыңдаушы бар. Сонымен қатар жергілікті өзге ұлт өкілдеріне қазақ тілін тілдесу арқылы үйрету, ойын қазақша еркін жеткізе білуге жағдай жасау мақсатында «SOILE» клубы құрылды. Масанчи, Сортөбе, Бұларбатыр, Ауқатты, Бәйтерек және Қарасу ауылдарында ашық аспан астында «SOILE» клубы ашылып, жұмыс істеуде. Аталған ауылдарда клуб отырысы жазғы маусым кезінде ашық аспан астында апта сайын өтеді. Жыл соңына дейін қазақ тілін үйрету сабағына 1500 адамды қамту жоспарланған екен. Нәтижесінде, ауданда мемлекеттік тілді жетік мең­герген, қазақ тілінде еркін сөй­леп, ойын жеткізе алатын орта қалыптасады. Облыс әкімі Бердібек Сапарбаев та Қор­дай ауданына жұмыс сапары барысында Сортөбе ауылында болып, «SOILE» клубының кезекті отырысына қатысты. Әкім тыңдаушылармен сұх­баттасып, тіл адамның ең негізгі байлығының бірі екенін, сонымен қатар қазақ тілін ұлтаралық қатынас тілі ретінде қолдану керек екенін айтқан болатын. Қазір Қор­дайда тұрғындарға қазақ тілін үйрету жұмыстары бекі­тілген кес­теге сәйкес жүргі­зілуде. Жалпы, қордайлық өзге ұлт өкілдерінің қазақ тілін үйре­нуге деген құл­шынысы жоғары.

Қираған жөнделеді, сынған бүтінделеді. Бірақ осы оқиғадан кейін көптің көңілінде сан түрлі күпті ойдың да қалғаны шындық. Әрине, халыққа басу айтып, сабырға шақырған азаматтар да болды. Керісінше, патриот болып көрініп, оқиға есебінен өзінің ұпайын түгендегісі келгендер де табылды. Алайда Президент енді тұтас ұлт болып осындай теріс оқиғадан сабақ алуымыз керектігін айтты. Қақтығыс болған жерде ешқашан, ешқандай дамудың болмайтынын атап көрсетті. Сондықтан да мұндай жағдайдың қайталанбағаны абзал. Талайға кесірі тиген қақтығыстың салдарын жою мақсатында әлі күнге дейін тынымсыз жұмыс жүргізілуде. Бүгінгі таңда аудан, ауылдардағы ахуал бірқа­лып­ты. Ұлттың абыройына нұқ­сан келтірмеу, ешкімге зиян тигізбеу басты мақсат болса ке­рек. Мемлекет басшысының «Төл халқымыздың шынайы қа­сиеттері, болмысы қандай бо­­луы керек? Бұл, ең алдымен, кеңшілік, жомарттық, жай­саң­дық, жасампаздық деген сөз. Біз басқа ұлттарға, өзге е­дер­ге өне­ге, үлгі көрсетуіміз керек. Қа­зақ халқы бейқам, жал­қау, ерін­шек, оның қолынан еш­қан­дай жұмыс келмейді деген жағымсыз әңгімелерді до­ғару қажет. Бірақ осындай теріс пікір­лерді тоқтату үшін өзі­міз­дің ең­бек­қорлығымызды көр­се­туі­міз керек», деген сөздері де бар­­лық азаматтың санасында жүруі тиіс.

Жамбыл облысы