Алексей Алексеевичтің өзі дәрігерлерге, институттың бүкіл ұжымына ризашылығын білдірді. «Мен дәрігерлерге өте ризамын, оны сөзбен айтып жеткізе алмаймын, өзімді жақсы сезінемін, дендеріңіз сау болсын», деді ол. Сондай-ақ басқа пациенттер де Алексей Алексеевичті құттықтап, ізгі тілектерін білдірді.
Кардиохирургия бөлімшесінің меңгерушісі Рүстем Төлеутаевтың айтуынша, пациент стационарға жатқызылған кезде, оның шамалы күш түскенде ентігу, ауа жетіспеушілігі, жүрегі қысып, тез шаршау, жалпы әлсіздік сияқты шағымдары болған екен. Ол жағдайдың ауырлығын жүрек жиырылуының төмендеуімен де байланыстырды.
Пациент 15 жыл бойы созылмалы обструктивті өкпе ауруы және бронх демікпесімен есепте тұрған, жүрекке тексерілмеген және емделмеген, тыныс жетіспеушілігі бронх және өкпе патологиясымен байланыстырылған.
Кардиология және ішкі аурулар ғылыми-зерттеу институтында оған аралас аорта ақаулары (критикалық стеноз және 2 дәрежелі жеткіліксіздік), митральды қақпақшаның жеткіліксіздігі, 3 дәрежелі артериалды гипертензия диагнозы қойылып, хирургиялық емге көрсеткіштері бар екені айтылды. Пациенттің операциядан кейінгі жағдайы тұрақты, антибактериалды және дәрілік терапия алып, тыныс алу жаттығуларымен айналысуда.
