Қоғам • 25 Маусым, 2020

5,6 миллионнан астам қазақстандық Төтенше жағдай кезінде әлеуметтік көмекке ие болды

97 рет көрсетілді

Коронавирустық инфекцияның таралуына байланысты енгізілген Төтенше жағдай (бұдан әрі - ТЖ) кезінде 4,6 миллион қазақстандық "42,5 мың теңге" әлеуметтік төлем алды, 1 миллионнан астам адам азық-түлік топтамасымен қамтамасыз етілді. Бұл туралы Президент жанындағы Орталық коммуникациялар қызметінде онлайн режимінде өткен халыққа есеп беру кездесуі барысында Еңбек және халықты әлеуметтік қорғау министрі Біржан Нұрымбетов хабарлады, - деп жазады Egemen.kz.

Сұңғат ӘЛІПБАЙ

Еңбекминінің басшысы өз сөзінде Қазақстанда 16 наурыздан 10 мамырға дейінгі ТЖ режимі кезінде мемлекет тарапынан бұрын-соңды болмаған қолдау шаралары қабылданғанын атап өтті.

"Қысқа мерзімде, бірнеше күннің ішінде, Мемлекеттік әлеуметтік сақтандыру қорынан (бұдан әрі – МӘСҚ) Төтенше жағдайдың енгізілуіне байланысты табысын жоғалтқан адамдарға ең төменгі жалақы мөлшерінде мүлдем жаңа төлем - 42 500 теңге енгізілді. Бұл төлем бұған дейін жұмыс істеп келіп, мәжбүрлі түрде жұмыссыз қалған азаматтарға арналған. Әлеуметтік төлемге 8 миллион азамат өтініш беріп, критерийлерге сәйкес келетін 4,6 миллион адамға барлығы 321,9 млрд теңгеге көмек тағайындалды", - деді Біржан Нұрымбетов.

ТЖ режимін енгізу әлеуметтік-еңбек саласындағы мемлекеттік қызмет көрсету сапасына кері әсер етпеуі үшін 24 қызмет жедел түрде egov.kz порталындағы "Электрондық өтініштер" сервисіне орналастырылды.

Мемлекеттік әлеуметтік сақтандыру қорынан жұмысынан айырылу салдарынан (тиісті бос жұмыс орны болмаған кезде) төлем жасау процесін жеделдету мақсатында жұмыссыз мәртебесін беру мерзімі 14-тен күннен 3 жұмыс күніне дейін қысқарды.

"ТЖ кезінде 108,9 мың отбасына атаулы әлеуметтік көмек (бұдан әрі – АӘК) автоматты түрде тағайындалды. Сондай-ақ, осы кезеңде мүгедектік және мүгедектік бойынша төлемдер автоматты түрде 3 айға ұзартылды", - деп толықтырды Біржан Нұрымбетов.

Сонымен қатар, мұқтаж азаматтарға арналған азық-түлік жиынтығының ең төменгі құрамы бекітіліп, оны берудің арнайы тәртібі жасалды.

ТЖ кезінде 1 миллион 45 мың азамат:

- АӘК алушылар қатарынан 6 жастан 18 жасқа дейінгі 202,7 мың бала;

-109,6 мың тіркелген жұмыссыз;

- 648 мың мүгедек бала, I, II және III топтағы мүгедектер;

- мүгедек баланы тәрбиелеп отырған 84,9 мың адам азық-түлік жиынтығымен қамтамасыз етілді.

Күннің маңызды және өзекті жаңалықтарын «Егемен Қазақстан» телеграм каналынан оқыңыз