Қызылорда қаласында 160 отбасы баспаналы болды

Аймақтар • 03 Шілде, 2020

Қызылорда қаласында 160 отбасы баспаналы болды

133 рет көрсетілді

Елорда және Ұлттық домбыра күні қарсаңында Қызылорда қаласындағы Сырдария өзенінің сол жағалауынан әлеуметтік осал топтағы отбасыларға "Нұрлы-Жер" бағдарламасы аясында салынған арендалық тұрғын үйлердің кілті табысталды, - деп хабарлайды Egemen.kz.

Мұрат ЖЕТПІСБАЕВ

Облыс әкімі Гүлшара Әбдіқалықова баспаналы болған тұрғындарды елорда күнімен құттықтап, әр шаңыраққа жақсылық, ынтымақ пен бірлік, амандық тіледі.

Мемлекет басшысы Қасым-Жомарт Кемелұлы Тоқаевтың тапсырмасына сәйкес қабылданған мемлекеттік бағдарламалар өңірімізде сәтті жүзеге асырылуда. Бүгінде Алаштың анасы атанған қасиетті мекен қарқынды құрылыс алаңына айналды. Осыдан бір ай бұрын ғана 180 пәтерлік тұрғын үйді табыстадық. Ал бүгін, 160 отбасы баспанаға ие болып, қоныс тойын тойлағалы отыр. Жаңа баспаналарыңыз татулық пен берекенің ордасы болып, қуаныш пен бақыт, құт пен ырыс салтанат құрсын!,- деді облыс басшысы.

160 пәтерлік 5 қабатты тұрғын үйлердің құрылысын "Жабдықтау", "Сапақ", "Нұр-Талап и К", "Астана-Сервис" жауапкершілігі шектеулі серіктестіктері жүргізген. Өңір басшысы сол жағалауда жаңа қала салуды қолдаған құрылысшыларға қос мереке қарсаңында алғыс хат табыстады.

Соңғы жылдары Қызылорда қаласында 12 жаңа шағын аудан ашылып, 7 тұрғын үй кешені бой көтерді. 8,5 мыңға жуық қызылордалық баспаналы болды.

Сырдария өзенінің сол жағалауындағы жаңа қалада соңғы екі жылда республикалық, облыстық бюджеттерден 620 пәтерлік 13 көпқабатты арендалық тұрғын үй мен 240 пәтерлік 4 көпқабатты несиелік тұрғын үйлердің, сондай-ақ жеке құрылыс салушылардың есебінен 604 пәтерді құрайтын 14 көпқабатты тұрғын үйдің құрылысы жүргізіліп, ел игілігіне пайдалануға берілді. Биылғы жылдың соңына дейін 560 пәтерлік арендалық 11 көпқабатты үйдің және 590 пәтерлік несиелік 13 тұрғын үйдің құрылысын аяқтау жоспарланып отыр.