Павлодар әкімі Қайрат Нүкенов павлодарлықтарды екі бірдей мерейлі күнмен құттықтады.
"Келе жатқан Астана күнімен шын жүректен құттықтаймын", - дейді Қайрат Нүкенов. – Мемлекетіміздің басты мақсаты – халықтың әл-ауқатын көтеру. Қазіргі уақытта әлеуметтік жаңғырту мәселесіне ерекше назар аударылған. Міне, бүгінгі үйдің ашылуы – тұрғын үй саясатымыздың маңызды нәтижесі. Шаңырақтарыңыз әрқашан жақсылыққа тола берсін. Барлықтарыңызға ырыс, бақ-береке тілеймін.
Қалалық қаржы бөлімі басшысының орынбасары Асығат Ахметовтің айтуынша, баспаналы болған 72 адамның 27-сі – жергілікті атқарушы органдар өкілдері. Қалғандары – "Тұрғын үй құрылыс жинақ банкінің" салымшылары.
Бүгін қоныс тойын тойлаған 3-қалалық аурухананың сәулелі диагностика дәрігері Мейіржан Машрапов қала басшылығына ризашылығын білдірді.
"Бұл өміріміздің ең бақытты сәттердің бірі", - дейді ол. – Әкімдік пен "Тұрғын үй құрылыс жинақ банкіне" мемлекеттік бағдарламаға қатысып, сол арқылы бір бөлмелі пәтердің иесі болғанымызға алғыс айтамыз. Осынау қиын-қыстау заманда үй құрылысына атсалысқан азаматтарға да ризамыз. Дәрігер ретінде барлықтарыңызға зор денсаулық тілеймін.
Айта кетейік, "Сарыарқа" мөлтек ауданында бой көтерген жаңа үй 72 пәтерден тұрады. Олардың 36-сы бір, 18 – екі және қалған 18-сі үш бөлмелі пәтерлер.
