![Жаһанға жұртын танытқан](/media/2020/07/07/2018_10_05_nursultan-bolashak-program.jpeg)
Керей мен Жәнібек хандар бастаған ата қазақтың ұлы көші бүгінде жаңа әлемдегі Жаңа Қазақстан болып қалыптасып, «тарих толқынындағы» (Н.Назарбаев) кепиетті құндылықтарымызды түгендеу арқылы Мәңгілік ел идеясының отын маздатып жатсақ, бұл – ғасырлар сабақтарын Сана сахнасында жаңғыртып, бүгінгі жаһандық жаңалықтарды еліміздің даму моделіне енгізген Елбасы көрегендігі! Себебі ол Әлем мен Қазақстанның ендігі уақытта біртұтас болатынына бек сенеді. Мысалы, адамзатты жаппай қырып-жойып қана қоймай, ұзақ мерзімдік зардаптары генетикалық-мутанттық қасіретке ұшырататын атомдық-ядролық милитаризмге қарсы үндеген Елбасының «Әлем. XXI ғасыр» манифесі, зерделеп-зерттеп қарасақ, жер-жиһанның қамын ойлаған, сол арқылы ұлтымызға төнетін қатерді періштедей қанатымен қағатын тезистік тұғырнама. Мұны алты құрлық және «байырғы қазақ жерінде бір тағдыр және тарихи жады арқылы байланысқан, Ұлы дала елінің данқты тарихы мен дәстүрлерін жалғастырған Қазақстан азаматтары» («Мәңгілік Ел – патриоттық актісі», Н.Назарбаев) жүзеге асырады, кәдеге жаратады.
Тәуелсіздіктің алғашқы кезеңдерінен бастап-ақ, ең алдымен, Қазақ елінің ұлы өркениеттегі қайырлы қонысын анықтап алуды, әлемге танытуды көздеген Елбасымыздың мақсат-мұраты «Көрдім. Келдім. Жеңдім» дейтін цезарьлық пиғыл емес, шын мәніндегі интеграциялық паритетті, саяси-экономикалық және рухани теңдікті айшықтаған абыздық-ақылмандық саясат еді. Соны дәлелдеу үшін бұрынғы Кеңес Одағы мемлекеттерінің бірегейі болып, Біріккен Ұлттар Ұйымына, аса беделді прогресшіл саяси-гуманитарлық ұйымдарға мүшелікке қабылданып, халықаралық ауқымды іс-шараларға бел шешіп араласа бастадық. Дүниежүзілік діндер мен діни конфессиялардың ауызбіршілік жиындарын елордамызда тұрақты түрде ұйымдастырып, «аспаннан түскен төрт кітапты» түгендеп қойдық. Еуропадағы қауіпсіздік және ынтымақтастық ұйымы саммитінің, Азиада спорт ойындарының, ЭКСПО көрмесінің, қала берді Ауғанстан, Украина, Сирияға байланысты бітімгершілік кездесулердің Қазақстанда өткізілуі және табысты болуы еліміздің дәрпін дүниеге жайып, Нұрсұлтан Әбішұлының саясат сахнасындағы салмағын көрсетті.
Жаһанды жартыкөз жарықтай күлгін күйге түсірген қаржы дағдарысы, шындап келгенде, өркениеттің өрісін тарылтып, адами құндылықтардың қабырғасын қаусатып жіберуі мүмкін. «Алтын-күміс тас екен, арпа-бидай ас екен» деген қанағатшыл мәтел бүгінгі күннің заңдылықтарына астар бола алмайды.
«Қарынымның ашқанына емес, қадірімнің қашқанына жылаймын» деген сөз бар. Қадір – ол ұлттың рухы, мәдени мерейі, тарихи тағылымы! Рухың семсе – болашаққа бастайтын үмітің мен сенімің сөнеді. «Мың өліп, мың тірілген» қазақ мұны ешқашан ұмытпаған. Тарих сабақтары санасын сәулелендірген Елбасымыз егемендіктің ең алғашқы күндерінен бастап Қазақстан халқының тұтастығы мен тұрақтылығын, берекелі бірлігін қамтамасыз ететін шаралар шоғырын бірінші кезекке қойып, тарихи-рухани және мәдени тұғырымызды нығайтуға зор еңбек сіңірді. «Болашаққа бағдар: рухани жаңғыру», «Ұлы даланың жеті қыры» сынды концепциялық мақалалары, Мәңгілік ел идеясы тәуелсіз мемлекетіміздің шаңырағын көтерген Тұңғыш Президенттің әрбір қазақстандықтың жүрегіне жолдаған үшбу хаты, аманаты.
Әсіресе Мәңгілік ел идеясы астральдық, теологиялық ұғымдардан ұшқары, қиял-ғажайып әпсаналардан тысқары, Ата тарихымыздың алтын арқауын бүгініміз бен болашағымыздың қазығына байлаған Ұлттық Рухымыздың Декларациясы болды!
Ежелгі түркі дүниесінің дүбірлі даңғылында атой салған Мәңгілік ел болып қалу ұраны Тоныкөк, Күлтегін, Білге Қаған жазбаларынан құйындай ұйытқи көтеріліп, осыдан бес жарым ғасыр уақыт бұрын «қарағайға қарсы біткен бұтақтай» оқшау бүрлеп, жапырақ жайған қазақ ұлысын үйіріп тұрған еді. Алмағайып кезеңдерді бастан кешіріп, анталап келген дұшпанға сүйем жерін боданға бермей күрескен, қылыштың қылауында, шұбырған көштің шылауында шыбын жанын пида етіп, Еуразия кеңістігінде еңсегей елдің өрісін сақтап қалған бабаларымыздың ерлік дәстүрі, жиырмасыншы ғасырдың жендет жылдарында қаңғыған оққа басы байланып, қуғын-сүргіннің тақырында тарыдай шашылып, тоз-тоз боп кете жаздаса да, төзімі мен үмітін үзбей, ертеңгі күнге деген сенімін селдіретпеген аталарымыздың ақ-адал аманаты Елбасының Мәңгілік ел идеясымен ұштасып жатыр. Біз мұны жан-жүрегімізбен, бүтін болмысымызбен сезінеміз.
Ұлы дала ұлағаттарын тәуелсіз мемлекетті басқару ісінде асқан көрегендікпен жаратқан Нұрсұлтан Әбішұлының портретін сөзбен сомдағанда, айтпақ ойымыз бен парық-пайымдауларымыздың өзімізден бұрын туымды Тұлғаның образын жасаған, қайраткерлігін қазып, зерттеген әріптестеріміздің, зиялы қауымның пікір-толғамдарына ұқсап кете беретіні неліктен екен? Тыңнан түрен салғың келіп, тосын штрих-детальдар іздесең де, ой ұшқындары, айналып келгенде, қалың қазақтың Елбасына деген ұшан-теңіз құрметі мен махаббатынан асып кете алмай жатады. Әркімнің өз шындығы бар заманда Ақиқаттың біреу екендігі осы ма екен? Шымырлап қайнап, шамырқанып төңкерілген заманда адамзаттың даму динамикасына орай, көзқарастар мен ұстанымдар өзгеріп, саяси-экономикалық форматтар толысып, құндылықтар жаңғырып, жылнамалар жаңарып жатса да, өзгермейтін, өң бермейтін, ешкімге теңгермейтін Тұңғыштың аты – тұңғыш қой! Сардар жастың сәруар нұрына суарылған Тұлғаның мерейі биіктей берсін!
Бақберген ДОСМАНБЕТОВ,
Қазақстан Ұлттық ғылым академиясының академигі, «Парасат» және «Құрмет» ордендерінің иегері, Қызылорда қаласының құрметті азаматы