Өнер • 07 Шілде, 2020

Қойылымдардың онлайн-көрсетілімі

5 рет көрсетілді

«Астана Опера» мемлекеттік опера және балет театры TengriTV және театр сайты арқылы өнерсүйер қауымның назарына жиырмадан астам опера және балет туындысын, сондай-ақ әлемдік және отандық классиканың інжу-маржандарынан концерттік бағдарламалар ұсынбақ.

Онлайн-көрсетілімдердің репертуарынан байқағанымыз, ересектермен қатар жас көрермен­дердің де талғам-талабы барынша ескерілген сияқты. Мы­салы, елордалық театрдың музыкатанушылары мектепке дейін­гі және мектеп жасындағы жеткін­шектердің жазғы демалысына орай «Балаларға арналған классика», «Театрға саяхат» және «Балалар театрға шақырады» топ­тамаларын – С.Прокофьевтің «Петя мен қасқыр» симфониялық ертегісін, «Ішекті аспаптар үні», «Түрлі дауыстар әлемі», «Үрмелі және соқпалы аспаптар үні», К.Сен-Санстың «Жануарлар карнавалы» зоологиялық фантазиясын қазақ тілінде, Э.Григтің «Пер Гюнттың саяхаты» концертін тарту етпек.

Ал жалпы көрермен жақын күндерде «Астана Опера» балет труппасының көркемдік жетекшісі, Ресейдің халық әртісі Алтынай Асылмұратованың қойы­лымындағы Людвиг Мин­кус­тың «Дон Кихот», Адольф Адан­ның «Корсар», Фридерик Шопеннің музыкасына жазылған «Шопениана» қойылымдары мен т.б. атақты хореографтардың балет спектакльдерін тамашалай алады.

Театр ұжымы ұлттық және батыс еуропалық классик­тер­­­дің жауһар туындыларын, атап айтқанда, Евгений Бруси­лов­ский­дің «Қыз Жібек», Ахмет Жұ­банов пен Латиф Хамидидің «Абай», Джоаккино Россинидің «Жібек саты», Джаккомо Пуч­чинидің «Тоска» және т.б. қо­йы­лымдарын, сонымен қатар «Астана Опера» театрының бас дирижері Алан Бөрібаевтың – «Италиядан кеген хаттар», ди­рижер Абзал Мұхитдиннің «Жылдың сегіз мезгілі: Антонио Вивальди мен Астор Пьяццолла» жобаларын, Б.Қайырбековтің «Табысқан сұхбаттастар» шығар­машылық кешін шілде мен тамыз айлары кестесіне енгізіп отыр. «Астана Опера» Камералық залында өткен тамаша концерттер де көрермен көзайымына айналып, ұлы ойшыл, ағартушы, хакім Абай Құнанбайұлының туған күні құрметіне 10 тамызда ұсынылатын Ахмет Жұбанов пен Латиф Хамидидің «Абай» операсы жылдың ең айтулы онлайн оқиғасы ретінде ел есінде сақталады деп күтілуде.

Тағы бір айта кететін жайт, TengriTV-нің дизайны заманауи тұрпатқа лайықталып, көрермен талғамына сай жаңғыртылып ұсынылуда. Ол пайдаланушылар үшін мейлінше ыңғайлы әрі уақыт жағынан өте тиімді. Мұнан кейінгі уақытта бұрынғыдай бір аптаға арналған трансляциялар кестесімен емес, бір айлық кестемен танысуға, өнерсүйер қауым қойылымның өтетін күні мен уақытын алдын ала біліп отыруына жағдай жасалды. Бұл көпшіліктің спектакльдерді тез әрі оңай тауып алуына және өздеріне «визуалдық кестені» сақтауға мүмкіндік береді.

Соңғы жаңалықтар

Ұқсас жаңалықтар