![Қоғамда сенім пайда болды](/media/2020/07/10/1587366108_1587362897_kosheden-virus-akelme-kaz.jpg)
Байқағанымыздай, Президент жағдайға тура қарап, мәселені ашық мойындады. «Бізде бәрі жақсы» деген белден басу жоқ. Осыған дейін де Мемлекет басшысының «ауруын жасырмай», шындыққа тіке қарай алатын қасиетін талай көрдік. Президент кезінде қиын жағдайға тап болған ел тұрғындарының несие қарызын кешіруді тапсырды. Жеке табыс салығына қатысты да оңтайлы шешімдер қабылдады.
Ел халқы қиындыққа тап болғанда айтылған сөздер көңілге демеу берді, қоғамдағы өзекті мәселелердің шешілетініне сенім пайда болды. Денсаулық сақтау жүйесінің індетке тойтарыс беруге дайын болмағанын айтып, осы мәселе бойынша тергеу жүргізу және бұл жағдайдан сабақ алу қажеттігін жеткізді. Қ.Тоқаев аймақ басшыларының жіберген қателіктеріне де тиісті баға берілетінін айтты. Президент ұсынған қадамдардан жағдайдың жіті бақылауда екені анық байқалады. Бұл ертеңге деген сенімді одан сайын күшейте түседі. Президенттің халыққа үндеуі тосыннан келген індеттен абдырап қалған тұрғындарға демеу болғаны сөзсіз. Қолға алынған шаралардың тиімді жүзеге асып, нәтиже бергенін асыға күтеміз.
Бауыржан СЕРІКБАЕВ,
Еуразиялық интеграция институтының сарапшысы