Қателікті түзеуге қабілетті болуымыз керек

Пікір • 10 Шілде, 2020

Қателікті түзеуге қабілетті болуымыз керек

21 рет көрсетілді

Қазақстан Президенті Қасым-Жомарт Тоқаев халыққа телевизиялық үндеу жасады. Мемлекет басшысы қазір әлемдегі пандемияға байланысты қалыптасқан жағдайдың өте күрделі екендігін атап өтті.

Egemen Qazaqstan

Әлемде коронавирус індетінің таралуы азаймай тұр, тіпті көптеген мемлекетте қайта өршіп кетті. Бұл сөзімізге Америка, Таяу Шығыс, Азия, Аустралиядағы жағдайлар дәлел. Елімізде де ахуал күрделене түскені белгілі. Сол себепті Қазақстан Республикасының Президенті Қасым-Жомарт Тоқаевтың үндеуі маңызды әрі қажетті қадам болды.

Тәжірибе көрсетіп отырғандай, коронавируспен күрес мемлекет пен халықтың өзара әрекетін, қолдауын, түсіністігін, бизнестің әлеуметтік жауапкершілігін талап етіп отыр.

Бәрімізге мәлім, елімізде коронавирус фактілері тіркеле бастаған тұста мемлекет төтенше жағдай режімін енгізіп, дер кезінде қажетті шараларды қабылдай білді. Соның нәтижесінде індеттің таралуын едәуір бәсеңдете алдық. Президент халыққа арнаған үндеуінде коронавируспен ауырғандарға аурухана төсектерінің 70 %-ға дейін көбейтіліп, 43 мыңға жеткенін айтты. Тұрғындарға үй жағдайында медициналық қызмет көрсету мақсатында 400 әмбебап мобильді бригада жасақталғанын жеткізді. Бұл бағыттағы жұмыстар, әлбетте, бәсеңдемеуі шарт. Біз медицина жүйесін ұйымдастыруда кеткен қателіктерді дер кезінде түзетуге қабілетті болуымыз керек. Президент осыны ескертті.

Қазір бір-бірімізден кінә іздейтін кез емес. Әлемнің бірде-бір елі бұл індетпен күресудің жолын тапқан жоқ. Өзіміздің және жақындарымыздың қауіпсіздігі мен денсаулығын сақтап, қарапайым гигиена, әлеуметтік дистанция талаптарын орындайық. Азаматтарымыз осы арқылы індетке қарсы күрестегі жеңісті қамтамасыз етуге көмектеседі.

Осы тұста бизнестің әлеуметтік жауапкершілігін де арттыру маңызды болып отыр. Себебі соңғы уақытта азаматтарымыз дәріханаларда дәрілердің жоқтығына, бар болса да олардың бағаларының шарықтап кеткеніне шағымдануда. Бұған қарсы кеш болса да қатаң шаралар қолға алынуда.

Коронавирус біздің бірлігімізді сынға салуда. Бұл індетті де аз уақытта жеңетінімізге кәміл сенемін.

Айгүл ҚАПБАРОВА,

Сенат депутаты

Күннің маңызды және өзекті жаңалықтарын «Егемен Қазақстан» телеграм каналынан оқыңыз