Саясат • 14 Шілде, 2020

Алаш аза тұтқан күн

28 рет көрсетілді

Алаш жұрты азалы. Ресми мә­ліметке сенсек, бүгінде Қа­зақ­­­станның 59 899 азаматы ко­­рона­вирус инфекциясына шал­дығып, соның 34 190-ы дерттен айығыпты.

Өкініштісі сол, 375 отандасымыз індет құрығынан құтылып кете алған жоқ. Қазақ елі қара жамылғанда ел Президенті Қасым-Жомарт Тоқаев 13 шілдені – Ұлттық аза тұту күні деп жа­рия­лады. Мемлекеттік Туды тө­мен тү­сіріп, халқымыз пандемия құр­бан­дарын бір минут үнсіздікпен еске алды...

Иә, алапат індет алқымнан алған сайын асыл азаматтардан айырылып жатырмыз.

Ет жақынын жер қойнына табыстаған әр шаңырақтың шемен-шері – отандастарымызға ортақ қайғы. Мұндайда «тас – түскен же­ріне ауыр» деуші еді дана хал­қымыз.

Өзекті өкініштің өрті қары­ған сайын қабырғамыз қайысып, бұғанамыз майысады. Күндіз күлкіден, түнде ұйқыдан айы­рыл­дық. Апат айтып келмейді екен. Төбемізден оқ ұшып, жау жа­ғадан алмай-ақ айдың, күннің аманында қынадай қырыламыз деп кім ойлаған?! Ойламадық қой сол. Бойымызда бейқамдық, ойымызда сенбестік болды. Дүние жүзі дүр­лігіп жатқанда апат Қазақ елін айналып өтеді деп сендік. Тығылып той жасап, қыдырып қонаққа бар­дық.

Қазақ халқының басына төнген алғашқы қасірет пе еді бұл? Жоқ. Аспанымызды бұлт торлаған зұл­мат жылдарды бұған дейін де көп көрдік. Ашаршылық пен саяси қуғын-сүргіннің, небір сұрапыл соғыстың көзі тірі куәгерлері бар арамызда. Ол ол ма, еліміз егемендік алғаннан бері де сегіз рет аза тұтып үлгерген екенбіз. Тоғызыншысы – топан су емес, көзге көрінбейтін вирустың кесірінен жарияланды. Мемлекеттік туды тоғыз мәрте төмен түсірдік! Өңге емес, елдің ынтымағы, ырысы мен берекесі жеңді сол қасіреттерді. Бұл жолы да солай болмақ.

«Біз – талай зобалаң мен сынақ­ты бастан өткерген, тарихтың талай дауылына бой бермеген халықпыз. Батыр бабалардың жолын жалғаған бүгінгі ұрпақ та қазіргі қиындыққа төтеп береді деп сенемін. Бәлкім, бұл біздің бірлігімізді байқау үшін берілген сынақ шығар. Бір жеңнен қол, бір жағадан бас шығарып ұйымдаса білсек, бұл сыннан да өтерміз», деп Мемлекет басшысы да сын сағатта халқының қасынан табылып, ұлтты ұйыстыра білді. «Сал­мақты, сабырлы болайық!» деді.

Ұлттық аза тұту күні індет құр­бандарын еске алу іс-шаралары Қазақстанның түкпір-түкпірінде қол­ға алынды. Республикалық және жергілікті радиостанция­лар мен телеарналар ойын-сауық бағдарламалары мен жарна­маларды таратуды тоқтатты. Құр­бандарды үнсіз еске алу рәсімі республиканың барлық аймағында өтті. Бас мүфти Наурызбай қа­жы Тағанұлының бастамасымен елі­міздегі республикалық, об­лыс­тық ірі-ірі мешіттер мен ме­дре­се­лерде, қариларды даярлау орта­лық­тарында Құран қатым оқылды.

Шығыс Қазақстан облысында індет салдарынан жиырмадан астам адам көз жұмған еді. Соның арасында медицина саласының қызметкерлері де бар. Қаралы күн­де облыс тұрғындары қаза тап­қандардың отбасыларына көңіл айтып, қайғыларына ортақтасты.

Ақтөбе облысының барлық мемлекеттік мекемелеріндегі, ұйым­­дар мен кәсіпорындардағы Мем­­лекеттік ту төмен түсіріліп, облыс әкімі Оңдасын Оразалин, об­лыстық мәслихаттың депутаттары, Қоғамдық кеңестің мүшелері бастаған облыс тұрғындары пандемия құрбандарын бір минут үнсіздікпен еске алды.

Павлодар облысының әкімі Әбілқайыр Сқақов пен оның орын­басарлары, құқық қорғау орган­дарының басшылары, Nur Otan партиясының өкілдері облыстық әкімдіктің алдындағы алаңда жиналып, індет құрбандарын бір минут үнсіздікпен еске алды.

Ұлттық аза тұту күні Батыс Қа­зақ­­стан облысында да бірнеше ша­рамен аталып өтіпті. Яғни Тұңғыш Президент алаңындағы Мемлекеттік ту тұғырында, об­лыстық перинаталдық орталық және облыстық әкімдік ғимараты алдында өткен шарада жиналған өңір басшылары, тұрғындар мен дәрігерлер covid-19 құрбандарын, осы індетпен күресте қаза тапқан әріп­тестерін бір минут үнсіз тұрып еске алды. Осындай іс-шаралар барлық облыста өткенін тағы да қайталап айтамыз.

«Сабыр түбі – сары алтын!» «Үрей – дерттің жарымы, сабыр – емнің жарымы, төзім – сауығудың басы» демеп пе еді медицина ғылымының атасы атанған Ибн-Сина. Бізге де сол толағай төзім мен сарабдал сабыр қажет. «Жіп біріксе – арқан болар, ер біріксе – қалқан болар». Арқанымыз үзілмесе, бірлігіміз мүжілмесе, біз жеңбейтін дерт те, біз сөндіре алмайтын өрт те болмайды.

 

Соңғы жаңалықтар

Қазақтың Қыз Жібегі

Руханият • Кеше

Азаттық архитекторы

Елбасы • Кеше

Ақ боранның азаптары

Аймақтар • Кеше

Адам өмірі үшін арпалыс

Аймақтар • Кеше

Ұқсас жаңалықтар