Жүректің батырлығы

Таным • 15 Шілде, 2020

Жүректің батырлығы

24 рет көрсетілді

Ертеңгі күннің бүгінгіден жарқын болуына ықпал етіп, адамзат қоғамын алға апаратын құдіретті күш – білімге ғана тән. Демек, қай елдің де өркендеуі, өркениетті дүниеде өзіндік орын алуы – білім саласының даму бағытына тікелей байланысты.

Egemen Qazaqstan

Елбасымыз Нұрсұлтан Әбішұлы Назарбаев «Еліміздің ертеңі бүгінгі жас ұрпақтың қолында», деген болатын. Еліміз өркениетті елдердің қатарынан орын алып, ұрпағымыз қоғам қажеттілігіне сай болып жатса, бұл – ұстаз еңбегінің жемісі. Себебі ақынды да, батырды да, алыпты да, дананы да ұстаз тәрбиелейді.

«Мұғалімі қандай болса, қоғамы да сондай болмақ» деп келетін бұлжымас заңдылық бар. Адамзат өркениетінің даму тарихында жақсы мектебі мен мұғалімдері бар мемлекет қана озып шыққан. Осы орайда білім беру саласында көп жылдан еңбек етіп келген әріптесім жайлы ой қозғағым келеді. Хадиша Мантайқызы Шаймерден – 1965 жылы Қазақ мемлекеттік педогогикалық қыздар институтын тәмамдап, Ақмола облысы, Астрахан ауданы, Қызылжар орта мектебіне химия және биология пәні мұғалімі болып еңбек жолын бастаған. Ол табанды еңбектің арқасында мектеп директоры дәрежесіне дейін көтерілді. 1991 жылы мемлекеттік тілде оқытылатын мектептерді ашу сұранысы туындаған кезде Хадиша Мантайқызы осы қызметке белсенді араласып, Жітіқара қаласында және басқа аудандардан мектеп жанындағы интернатқа қазақ ұлтының балаларын жинады. Жетіқара, Қамысты және басқа да бірнеше аудандарындағы қазақ мектептерінің мұғалімдеріне семинар өткізіп, орыс тілінен қазақ тіліне әдістемелік нұсқаулықтарды аударып, дидактикалық материалдар жинағын құрастырды, жас мұғалімдерге көмек көрсетті. 2000 жылы Астрахан ауданына аудандық білім бөліміне бас маман боп оралды.

2001-2005 жылдары Жалтыр №4 орта мектебінде мектеп директорының оқу ісі жөніндегі орынбасары болса, соңғы жылдары химия және биология пәнінің мұғалімі ретінде жұмыс істеп келді. Мұғалім еңбегінің нәтижесін облыстық білім басқармасы, Білім және ғылым министрлігі тарапынан алған марапаттауларынан байқауға болады.1998 жылы «ҚР Білім беру ісінің үздігі» атағын иеленді. Астрахан ауданының 80 жылдығына орай басылып шыққан « Есілдің жағасында» атты кітапқа «Қазақстан ағарту ісінің үздігі» ретінде енді.

Бойында ұлылықтың жатқан ізі,

Келешек ғасырға да үлгі ісі.

Шуақты, шежірелі тарихы бар,

Хадиша апай – мектебімнің мақтанышы.

Қасиетті қара шаңырақтан білім нәрімен сусындап, мұғалім деген атақты алып шығу, оқушыларға жақсы тәрбие мен білім беру – үлкен ерлік. Себебі біз тәрбиелеген ұрпақ ертеңгі күні еліміздің тірегі болмақ. Тәуелсіздіктің тұғырын, еліміздің тыныштығын сақтап қалатын да солар. Сондықтан ұстаз болу – жүректің батырлығы.

Гүлдана ИСКАКОВА,

Жалтыр №4 орта мектебінің тарих пәнінің мұғалімі

Ақмола облысы