Жасотандықтар бастаған еріктілер 800-ден астам денсаулық себетін медицина қызметкерлеріне үлестіріп үлгерді. Алматы қаласы бойынша коронавирустың алдын алу және ведомствоаралық комиссиясының қолдау көрсетуімен жүзеге асқан жобаның алғашқы күні мегаполистегі үш бірдей іргелі аурухананың қызметкерлері қолдау пакетіне ие болды. Жиынтық иммунитетті нығайтуға арналған өнімдерден құралған. Айтулы науқан алдағы 4-5 күн бойы жалғасын табатын болады.
– Әлемді шарпыған коронавирустық инфекция ешкімді бейжай қалдырған жоқ. Осындай сын сағатта дәрігерлеріміз өзгелердің өмірі үшін аянбай күресуде. Төрт ай бойы тер төгіп, отбасынан жырақта жүрген бүгінгі қоғамның батырларына алғыс білдіргіміз келді. Олардың еңбегінің арқасында қаншама жан денесін дендеген дертінен айығып, аяққа тұрды. Акцияға арнайы дайындықтан өткен 10-ға жуық ерікті жұмылдырылды. Олардың әрқайсысы қорғаныш құралдарымен қамтамасыз етілген. Акция барысында барлық сақтық шаралары ескерілді, – дейді ерікті Бекембай Сахи.
АЛМАТЫ
