– Елімізде қазір коронавируспен бірге пневмония дерті де ушығып тұр. Осы айда облыстық аурухана жанынан 400 орындық инфекциялық стационар ашылады. Ал Құрманғазы ауданында қосымша орындар жасақталып жатыр. Біз қажетті стационарлық орынмен, дәрі-дәрмекпен, құрал-жабдықпен толықтай қамтамасыз етеміз. Бізге ашылып жатқан стационарлық орындарда науқастарды емдейтін тәжірибелі дәрігерлер керек. Жылдар бойы түйінді мәселеге айналған медициналық мамандардың тапшылығы қазіргі кезде анық байқалды. Соған қарамастан, қазір біздің дәрігерлеріміз алдыңғы шепте аянбай еңбек етуде. Дегенмен біразы қауіпті індетті жұқтырды, қалғаны індетпен күресу үстінде. Атқарар жұмыс көп. Бізге сіздердің тәжірибелеріңіз, білімдеріңіз бен біліктеріңіз қажет болып тұр, – деді облыс әкімі.
Өткен аптада өңір басшысы Махамбет Досмұхамбетов Ресейдегі Астрахань облысының губернаторы Игорь Бабушкинмен медицина қызметкерлерін Атырауға шақыру туралы келісім жасаған болатын. Мұнайлы өңірмен қоңсы қонған Астраханьнан келген бес дәрігерді жалақымен, жатын орнымен, тамақпен қамту, жүріп-тұру мәселелері толық шешімін тапты. Қазір олар да қауіпті індетті жұқтырған науқастарды емдеуге кірісті. Облыстық денсаулық сақтау басқармасы басшыларының айтуынша, ресейлік дәрігерлердің кейбірі аудандарға жіберілуі мүмкін.
Астраханьдық дәрігер Анна Чепельдің айтуынша, Атырауда алаңсыз жұмыс істеуге барлық жағдай жасалды. Сол себептен, олар атыраудық әріптестеріне коронавирус инфекциясын емдеуге көмектесуге барын салғалы отыр. Ресейдегі Королев қаласынан келген дәрігер Вероника Богомазованың пікіріне сүйенсек, екі елдің коронавирус инфекциясын емдеу тәсілінде айтарлықтай өзгеріс жоқ. Тіпті бірдей деуге болады.
– Бұл індетті жеңу – барша дәрігердің арманы. Науқастарды емдеу барысында қазақстандық, не ресейлік тәсілді қолдану қажет деген пікірталас болмауы қажет. Алайда әлеуметтік желілерде екі ел дәрігерлерінің арасына алауыздық тудыратындай пікірлер кездесіп жатады. Мәселен, менімен бірге келген ресейлік дәрігерлердің ешқайсысы «Қазақстандағы коронавирусты емдеу тактикасы дұрыс емес» деген мәлімдеме жасаған жоқ. Әрине болмашы айырмашылықтар кездесетін шығар. Бірақ негізгі терапия Ресейдегі хаттамаға сәйкес келеді. Сондықтан әлеуметтік желілерде тарап жатқан жаңсақ пікірлерге сенбеген жөн, – дейді ол.
Атырау облысы
