Мысалы, өнеркәсіп саласында 103,5%, құрылыста – 131,8%, инвестиция тартуда – 108,3%, баспана беруде – 111,8%, ауыл шаруа­шылығында 103,3% өсім байқалған.

Былтырғымен салыстырғанда жергілікті бюджеттің түсімі 29,2%-ға артқан. Бұл жос­пардағыдан 11,6%-ға артық.

Өндіріс саласында индекс өсімінің нақ­ты көлемі өңдеу секторының өсуі есебінен қам­тамасыз етілді. Бұл жердегі көрсеткіш – 106,4%. Ал тау-кен өндірісі секторында ол 105,7%-ды құрады.

Бүгінде «АрселорМиттал Теміртау» және «Қазақмыс» корпорациясы» алпа­уыт кәсіпорындардың тұрақты жұмыс істеп тұрғанын айтқан жөн. Әлемдік нарықта мыс пен болат бағасының өскені байқалады.

Облыс бойынша өнеркәсіп өнімінің көлемі алты ай ішінде 1,360 трлн теңгені құ­рады. Бұл қарқынның жылдың соңына дейін сақталатынына облыс басшылығы сенімді.

Инвестиция саласына келсек, биылғы жарты жылдың қорытындысы бойынша облысқа 300 млрд теңгеден астам капитал келген. Бұл алдындағыдан 8,3%-ға артық және мұның 85%-ы – жеке инвестиция.

Бұдан бөлек, шетел инвесторлары бел­сенді түрде атсалысқан 44 жаңа инвести­циялық жоба іске асырылып жатыр. Мұн­дағы сома 2 трлн теңгені құрап, 13 мың жаңа жұмыс орнын ашуды көздейді.

Жылдың соңына дейін 231 млрд теңгені құрап, 3,5 мың жоғары өндірістік тұрақты жұмыс орнын ашатын 14 жаңа жоба іске қосы­лады. Қазірдің өзінде оның бесеуі жұмыс істей бастады.

Саран қаласындағы бұрынғы резино-техникалық өнімдері (РТИ) зауытының базасында қытайлық әлемдік көшбасы «Yutong» компаниясының қаты­суымен автобустар мен арнайы техникалар шығару жобасы іске асырыла бастады. Сәтін салса, жылдың соңына қарай алғашқы автобус конвейерден шығуы тиіс.

Сонымен қатар осы зауыттың базасында биыл жылына 3,5 млн дана автомобиль шина­ларын шығаратын жоба да қолға алын­бақ. Бұл жобаларды жүзеге асыру облыс эко­но­микасын әртараптандыруға оң әсе­рін тигізе­ді және машина жасау үлесін екі есе­ге арттырады.

Шағын және орта бизнес туралы айтар бол­сақ, биылғы жылдың басынан бері жұ­мыс істеп тұрған кәсіпкерлік субъек­тілерінің саны 0,5%-ға өсіп, 88400 бірлік­ті құрады. Бұл салада бүгінде облыс­тың экономикалық тұрғыда белсенді тұрғында­рының 35%-ы қамтылған. Олар бойынша инвестиция тартудың өсімі 20%-ды құрады.

Дағдарысқа қарсы шаралар арқылы об­лыс­тың 30 мыңнан астам кәсіпкері салық, банк алдындағы кредит және жалға алу ақы­­сы бойынша кейін төлеу жеңілдіктеріне ие бол­ды.

 Облыста құрылыс саласында биылғы жартыжылдықтың қорытындысы бо­йынша жұмыс 131,8%-ды құрады. Оның ішінде тұрғын үйді пайдалануға беру қарқыны 11,8%-ға артты. Биыл былтырғыға қарағанда тұрғын үйді пайдалануға беру ісін 42,5%-ға арттыру міндеті алға қойылған.

Өңірде сапалы ауыз сумен қамтамасыз ету бойынша ауқымды жұмыс жүргізі­луде. Бұл бағытта тұрғындарды орталықтан­ды­рылған ауыз сумен және арнайы тартыл­ған су құбырымен қамтамасыз етудің 95 жо­­басын іске асыру қолға алынған. Мұ­ның өзі биыл қалалық тұрғындардың 98%-ын және ауылдықтардың 87%-ын орта­лықтандырылған ауыз сумен қамтама­сыз етуге мүмкіндік береді. Ал 2021 жылы қыз­­меттің мұндай түрімен қалалықтарды және 2023 жылға қарай ауылдық жерлердің тұрғын­­дарын 100%-ға қамтамасыз ету жос­парда бар.

Облыс экономикасы үшін автомобиль жолдарының маңызы зор. Биыл «Қараған­ды-Балқаш» және «Балқаш-Бурылбайтал» жол учаскелері пайдалануға беріледі. Мұ­ның алдында, яғни осы жылдың 6 шілде­сінде Қарағандыны айналып өтетін «Солтүс­тік және Шығыс айналма жолы» ашылды. Бұл жобаларды Индустрия және инфра­құрылымдық даму министрлігі іске асырып жатыр.

Жол өңірдің дамуына стратегиялық тұр­ғыда игі ықпалын тигізетін болады. Іргелес салаларды есепке алғанда, бұл жүргізіліп жатқан жұмыстар 20 мыңнан астам жұмыс орнын ашуға мүмкіндік берді.

Ауыл шаруашылығы саласы да ұятқа қал­дыр­май тұр. Ауылшаруашылық өнім­де­рінің нақты көлем индексі мал ша­руашылығы өнімдерін өндіру өсімінің арқа­сында 103,3%-ды құрады.

Алғашқы жартыжылдықта азық-түлік тауарларына арналған тұтыну бағасының индексі 103,9%-ды құрады. Оның ішінде әлеу­меттік маңызы бар азық-түлік тауар­ларына арналған баға индексі 104,5% болды. Бұл республика бойынша орташа мәннен төмен.

Енді, төтенше жағдай кезінде табысынан айырылған кәсіпкерлер мен тұрғын­дарға әлеуметтік төлем төлеу бойынша мы­наны атап өтуге болады. Облыста 272 мың адам 42 500 теңге мөлшерінде төлем алды. Бұл экономикалық белсенді тұрғындардың 40%-ын құрайды. Коммуналдық қызметтің 15 мың теңгелік өтемақысын облыстың 76 500 тұрғыны алды. Бұл дегеніңіз 2 млрд теңгеден астам қаржы. Сондай-ақ төтенше жағдай кезеңінде облыстың 80 мың тұрғыны азық-түлік және тұрмыстық жиынтықтар түріндегі көмекпен қамтамасыз етілді.

Елбасының бастамасы бойынша «Бірге­міз» қоры арқылы облыстың 40 мыңнан астам тұрғыны 2,2 млрд теңге мөл­шерінде көмек алды. Сонымен қатар атаулы әлеу­мет­тік көмек алатын еңбекке жарамды тұрғындардың 74%-ы жұмысқа тартылды.

Жалпы алғанда, еңбек нарығындағы ықпал ету іс-шараларының нәтижесінде жыл соңына дейін 43 мыңнан астам адам жұмыспен қамтылмақ. Сонымен бірге 30 мыңнан астам жаңа жұмыс орындары ашылады. Мұның өзі облыста жұмыссыздар санының өспеуіне игі әсерін тигізері сөзсіз.

Қарағанды облысы