Руханият • 29 Шілде, 2020

Шоғырда шоқтығы биік

116 рет көрсетілді

Ол да отызды алқымдады. Алқынбады. Талпынғаны – тоғышардың туын құлатып, жемқордың желкенін қию. Алақандай елінің Алатаудай арманын орындап, ұлтының бар болса барын бағамдау, жоқ болса жоғын түгендеу. Тартынғаны... Тартынғаны одан да көп: адамгершіліктен аттамау, ауыз жаласқан сыбайласты жақтамау. Алысқа бармай-ақ жақыннан қайтып отырмыз. Аңыздағы Алпамысты емес, ел басқару ісіне ерте араласқан, бүгінде Сыбайлас жемқорлыққа қарсы іс-қимыл агенттігі Стратегия және жедел басқару департаментінің басшысы Нұрлан Ибрагимұлы Жақсымбетовті айтып отырмыз.

Көлгірсіп қайтейік. Оның көзін көріп, қол алысып амандасқан емеспін. Қайсыбір кездесулерде жүздессек жүздескен де шы­ғармыз. Әзір есте жоқ. Дүние жүзін дүрліктірген пандемия, жүріс-тұрысты жұтаңдатқан карантин болмағанда емен-жарқын әңгімелесер ме едік? Кім білсін... Телефон арқылы тілдестік. Салмақты дауыс, сабырлы үн. Тұтқаның бергі жағында тұрып-ақ азаматқа тән байыпты аңғардық. «Жылқы – кісінескенше, адам – түсініскенше» екен ғой. Біздің «бір көрген – білісіміз» осылай басталды. 

Қызылды-жасылды дүниеге жұрт қызықса да, ол қызыққан жоқ. Бақай есеп пен қулық-сұмдықтан басын аулақ салды. Өзекке түскен жегіқұрттай жемқорлық жайлаған заманда адалдық пен ар-ұжданның ақ туын көтеріп тұратын жас­тар қажет-ақ еді. Сол туды Нұрлан Ибра­гимұлының қолынан көргендей болдық. Азат күнге қарап елжіреп, ерке желге елтіп желбіреп тұрды сол байрақ. Соған жібіген жүректе де, оны ұстап тұрған білекте де қасиет бар. Бүгінгі буынға үлгі, ертеңгі ұрпаққа өсиет бар.

Маңғыстау облысына қарасты Ақтау қаласында кіндігі кесіліп, түндігі түріл­ген азамат М.Ломоносов атындағы Мәс­кеу мемлекеттік университетінің «Мем­­лекеттік басқару» факультетін тәмам­дап, еңбек жолын құқық қорғау орган­дарының сапында бастады. Одан соң Экономикалық және сыбайлас жемқорлыққа қарсы күрес агенттігінің (Қаржы полициясы) ақпараттық-талдау департаментінде екі жыл қызмет етіп, кейін «Самұрық-Қазына Инвест» ЖШС инвестициялық-талдау департаментінің бас менеджері болып та жұмыс істеп көрді. Алған бетінен қайтқан жоқ. Сыбай­лас жемқорлыққа қарсы іс-қимыл ұлттық бюросында тер төгіп, «Проект-Консалт» ЖШС-інде сарапшы болды.

Алдына нақты мақсат қоя білген ар­ман­шыл жастың соны соқпағы осылай қалыптасты. Мемлекеттік қызмет істері және сыбайлас жемқорлыққа қар­сы іс-қимыл агенттігі төрағасының кеңес­шісі, Сыбайлас жемқорлыққа қар­сы іс-қимыл агенттігі Кадр жұмысы депар­таментінің басшысы лауазымдарын абы­роймен ат­қар­ды. Бүгінде – аталған агент­тіктің Стра­тегия және жедел басқару депар­тамен­тінің басшысы. Сондай-ақ қазақ, орыс, ағылшын тілдерін жетік меңгерген талап­ты жас елге сіңірген еңбегі ескері­ліп, «Құрмет» орденімен марапатталды.

Отызға жетпей орда бұзған азаматқа осымен шектелуге де болар еді. Бағы мен бабын қатар сынап, Мемлекет басшысы Қасым-Жомарт Тоқаевтың бастамасымен жүзеге асқан Президенттік жастар кадрлық резерві жобасына қатысуға бел буды. Байқаса, бекер емес екен. 13 мың азаматтың арасынан «жүзден – жүйрік, мыңнан – тұлпар» көрі­ніп, іріктелген 300 жастың қатарынан табылды.

– Бұл жобаның бір күндік бастама емес, еліміздегі басқару жүйесін жаң­ғыртудың ұзақ мерзімге бағытталған жаңа тетігі екені айқын болғандықтан жә­не оның талаптарына білімім, жасым, жұмыс тәжірибем сәйкес келгендіктен қатыс­тым. Себебі мұнда басты міндет – білікті басшылардың жаңа буынын қалыптастырып, жастарды халыққа адал қызмет етуге ынталандыру, – дейді Нұр­лан Жақсымбетов.

Жас келсе, іске! Жастар кадрлық резер­ві мемлекеттік қызмет саласын жаңар­туға, жаңғыртуға озық ойлы, заманауи көшбасшыларды тартуға мүмкіндік береді. Ал оған жаңа формацияда басқа­ру­шы болуға қабілетті, талантты және креативті жас қазақстандықтар ғана таң­дап алынатынын ескерсек, бұл жобада Нұрлан Ибрагимұлының бағы жанбауы мүмкін емес еді. Себебі ол Президенттік жастар кадрлық резервіне өтпес бұрын да Қазақстанның сыбайлас жемқорлыққа қарсы саясатының дамуына, атап айт­қанда 2015-2025 жылдарға арналған сыбайлас жемқорлыққа қарсы стратегия­сын әзірлеуге, сыбайлас жемқорлыққа қарсы қызметте ашықтық пен айқындық қағидаттарын кешенді жылжытуға, сон­дай-ақ оның азаматтық қоғам институттарымен өзара кең іс-қимылына белсенді аралас­қан болатын.

– Жобаға тек қатысушы емес, мемле­кет­тік қызметші ретінде өзімнің білімім мен тәжірибемнің, біліктілігімнің сыналатын және бағаланатын маңызды сәті деп қара­дым. Үлкен сыннан сүрінбей өтіп, өз қабілетімді дәлелдеген 300 жастың бірі болғандықтан халық еліміздің дамуына зор үлес қосып, қалтқысыз қызмет етеді деп үміт күтеді. Сол себепті бұл бастама мен үшін мемлекеттік идеяларды, өзімнің тың ойларымды іске асыруға берілген мол мүмкіндік, – дейді ол ағынан жарылып.

Айтуынша, әлемнің дамыған озық мемлекеттерінің қатарынан Қазақ­стан­ды көргісі келеді. Білімі мен күш-жігерін, құзыретін еліміздің Сыбайлас жем­қорлыққа қарсы саясатын сапалы іске асыруға жұмсауды ойлайды. «Балдырғандарым жемқорлық жайла­маған Отанда өмір сүруі үшін тынбай­ еңбек етемін», дейді. Ең бастысы оның мақ­­сат-мүддесі – халықтың арман-мұра­ты­мен үндеседі.

Прези­денттік жастар кадрлық резер­віне Мемлекет басшысынан бастап, қара­пайым халыққа дейін үкілі үміт артып отыр. Елі­мізді биікке жетелейтін, жаңаша да­муға бастайтын білікті жастардың жаңа шоғыры қалыптасты деген сенім бар. Алай­да, шоғырда да шоқтығы биік жан­дар болады емес пе? Сол шоқтық жең ұшы­­нан жалғасқан жемқорлықты жеңсем деп жүрген Нұрлан Жақсымбетовке тие­сі­лі!

 

Соңғы жаңалықтар

Дипломаттар 150 ноутбук сыйлады

Қазақстан • Бүгін, 17:50

Ұқсас жаңалықтар