Үздіктер көшін Мұхаммед Әли мен Джордж Формэн арасындағы «жан алысып, жан беріскен» бәсеке бастап тұр. Аса ауыр салмақта күш сынасқан америкалық қос саңлақ 1974 жылдың 30 қазанында қазіргі Конгоның астанасы – Киншасада екі бірдей алтын белбеуді сарапқа салды. Сегізінші раундта Әлидің айқын жеңісімен аяқталған бұл жекпе-жектен қазіргі ақшаға аударсақ, 510 миллион АҚШ доллары көлемінде табыс түскен екен.
Екінші және үшінші орын ешкімнен жеңіліп көрмеген америкалық арлан Флойд Мейвезерге бұйырды. 2015 жылдың 2 мамырында ол филиппиндік Мэнни Пакьяо және 2017 жылдың 26 тамызында ирландиялық Конор Макгрегормен айқасып, екеуінен де басым түсті. Бұл бәсекелердің әрқайсысы 500 миллион доллар пайда әкелді.
Сондай-ақ, табысы мол үздік ондықтың қатарына мына кездесулер енді: Мұхаммед Әли мен Джо Фрэзер (01.10.1975) – $500 млн., Мұхаммед Әли мен Джо Фрэзер (08.03.1971) – $300 млн., Майк Тайсон мен Эвандер Холифилд (28.06.1997) – $281 млн., Флойд Мейвезер мен Оскар Де Ла Хойя (05.05.2007) – $200 млн., Майк Тайсон мен Питер Макнили (19.08.1995) – $177 млн., Флойд Мейвезер мен Рикки Хэттон (08.12.2007) – $160 млн. және Флойд Мейвезер мен Сауль Альварес (14.09.2013) – $160 млн.
2017 және 2018 жылдардың қыркүйек айында қазақстандық Геннадий Головкин мен мексикалық Сауль Альварестің екі рет жекпе-жекке шыққаны белгілі. Бұл бәсекелерден де мол табыс түсті. Алғашқы кездесу 100 миллион, қарымта айқас 117 миллион доллар кіріс әкелді. Жоғарыдағы тізімде бұл сәйкесінше 24 және 18 орындар.
