Министрдің айтуынша, кәсіпкерлікті қолдау және дамыту үшін бизнес-климатты жақсартатын бірқатар шаралар қабылданды. Бұл салықтық ынталандыру, тексерулерді қысқарту және несиелеуді кеңейту және басқалары.
– Экономикалық өсімді қалпына келтіру үшін жыл соңына дейін кешенді жоспар мен бизнесті қолдауға бағытталған қосымша шаралар қабылданды. Арнайы мемлекеттік комиссия жұмыс істеуде. Биыл Парламент бизнес-климатты жақсарту жөніндегі заңнамалық реформалардың 8 пакетін қабылдады. Орта мерзімді перспективада кәсіпкерлік қызметті дамытуда «жаңа күн тәртібі» әзірленетін болады. Шағын және орта бизнесті одан әрі дамыту бағыты Қазақстанның 2025 жылға дейінгі жаңа стратегиялық жоспарында көзделеді, – деді Р.Дәленов.
Оның айтуынша, құрылыс саласында «5-10-20» қанатқақты жеңілдетілген кредит беру жобасын іске қосу жоспарлануда. Сондай-ақ экономиканың әртүрлі салаларында 1 қазанға дейін еңбекақы төлеу қорына салынатын салықтар, әлеуметтік төлемдер және мүлік салығы бойынша нөлдік мөлшерлеме белгіленді.
Кәсіпкерлердің құқықтарын қорғау үшін кәсіпкерлердің «адалдық» презумпциясы қолданысқа енді. Бұл заңнамадағы әртүрлі түсініктерді адал кәсіпкерлердің пайдасына қолдануға мүмкіндік береді. «Бизнестің жол картасы-2025» және «Қарапайым заттар экономикасы» бағдарламалары бойынша кәсіпкерлер үшін қарыз қаражатының соңғы құны қазір 6%-ды құрайды. Сонымен қатар Ұлттық банк шағын және орта бизнеске, оның ішінде жеке кәсіпкерлерге салалық шектеусіз жеңілдетілген несие беру бағдарламасын іске қосты. Кредиттер айналым қаражатты толықтыруға 1 жылға 8%-бен беріледі. Бұл бағдарламаға 600 млрд теңге бөлінеді.
– Кепілдік беру құралы жақсартылды. «Бизнестің жол картасы-2025» бағдарламасы бойынша кепілдіктер қарыз сомасының 85%-ын құрауы мүмкін. «Қарапайым заттар экономикасы» бойынша кепілдік несие сомасының 50%-ына тең. Ауыл шаруашылығы мақсатындағы жерлерге жыл соңына дейін жер салығының мөлшерлемесі нөлге түсті. Сондай-ақ асыл тұқымды мал шаруашылығы саласында импорттау кезінде қосылған құн салығын есепке алу әдісімен төлеу мүмкіндігі берілді. Қазанға дейін әлеуметтік маңызы бар азық-түлік тауарлары үшін қосымша құн салығының мөлшерлемесі 12%-дан 8%-ға дейін төмендетілді. Еліміздің барлық өңірлеріндегі бизнес өкілдерінен өзекті мәселелер бойынша келіп түскен ұсыныстар жүйеленуде, – деді спикер.
Баспасөз мәслихаты барысында жыл соңына дейін бизнестің барлық санаттағы субъектілері үшін жаңа жоспарлы салықтық тексерулер жүргізілмейтіні айтылды. Барлық шаралар бойынша жауапты мемлекеттік органдар мен ұйымдар анықталып, тиісті жұмыстар атқарылуда.
