«Самұрық-Қазына» қоры жоспарлы қаржылық көрсеткіштерді асыра орындады

Экономика • 31 Шілде, 2020

«Самұрық-Қазына» қоры жоспарлы қаржылық көрсеткіштерді асыра орындады

4 рет көрсетілді

«Самұрық-Қазына» Ұлттық әл-ауқат қоры қаржылық көрсеткіштерді жоспардан асырып орындады. Бұл туралы «Самұрық-Қазына» қорының қаржы және экономика жөніндегі тең басқарушы директоры Ернар Жанәділ баяндады.

Думан АНАШ

Оның айтуынша, 2020 жылдың қаңтар-маусым айлары аралығындағы қор мен компаниялар тобының операциялық кірісі 215 млрд теңгені құрады. Ал бұл жоспардағы межеден 79 млрд теңгеге көп.

«Самұрық-Қазына» Ұлттық әл-ауқат қоры» АҚ компания тобының 2020 жылдың І жартыжылдығындағы таза кірісі 212 млрд теңге болып отыр. Негізгі жоспар бойынша 150 млрд теңге көлемінде шығын күтілген. 2020 жылдың соңына дейін компанияның таза кірісі жоспарда 167 млрд теңге деп көрсетілгеніне қарамастан, кіріс 421 млрд теңге деңгейінде болады деп күтілуде.

Ернар Жанәділдің сөзіне қарағанда, нарықтағы дағдарыстық тенденциялар топтың қаржылық нәтижелеріне айтарлықтай әсер еткен. Дегенмен қордың портфельді компаниялары Covid-19 пандемиясы салдарынан жаңартылған жоспарлы көрсеткішті орындап жатыр және қаржылық тұрақтылықты сақтау бойынша іс-шараларды жалғастырып жатыр.

«2019 жылдың қорытындысы бойынша Қор 206 млрд теңге көлемінде таза пайда алды. Дивидендтерді төлеуші ретінде Қор барлық кірісті мемлекетке жібереді. 2019 жылы КАП акцияларынан қосымша орналастырудан түскен 49 млрд теңгені Ұлттық қорға бағыттады. Сонымен қатар 2019 жылдың қорытындысы бойынша Қор Үкіметке 120 млрд теңге көлемінде дивидендтер жібереді. Қордың жалғыз акционері Үкіметтің тапсырмасына сәйкес қалған қаражат Түркістан және Нұр-Сұлтан қалаларындағы әлеуметтік нысандарды қаржыландыруға жұмсалады», дейді Ернар Жанәділ.

Онлайн-брифинг барысында қор портфельдік компаниялардың қаржы ресурстарын басқару мәселесіндегі тәсілді қайта қарап, нарықтағы жағдайға байланысты шығыстарды қысқартқаны мәім болды.

«Сыртқы ортадағы үлкен өзгерістерді ескере отырып, компанияның жаңартылған даму жоспарына сәйкес топ шығындарды 429 млрд теңгеге қысқартты. Топтың компаниялары өндірістегі шығындар мен компаниялардың стратегиялық мақсаттарын ескере отырып, шығындарды оңтайландыру бойынша шаралар қабылдады», деді Ернар Жанәділ.

2020 жылдың 6 айында қор тобы бойынша дебиторлық берешек 60 млрд теңгеге төмендеп, 661 млрд теңгені құрады.

Ернар Жанәділ оң қаржылық көрсеткіштер мұнайдың орташа бағасының өсуіне, теңгенің долларға қатысты бағамының нығаюына, сондай-ақ компаниялар тобы қызметінің нәтижелеріне байланысты екенін жеткізді.

Бірінші жартыжылдықта макроэкономикалық ахуалдың нашарлауына қарамастан, қордың жалпы борышы 3,9%-ға аздап ұлғайған. Бұл ретте топтың сыртқы борышы жыл басындағы көрсеткішпен салыстырғанда төмендеді. Ернар Жанәділ жалпы қарыздың 8,8 трлн теңгеден 9,2 трлн теңгеге дейін ұлғаюын теңгенің әлсіреуімен байланысты-
рады.

Сөз соңында Ернар Жанәділ Топтың қаржылық тұрақтылығын нығайту жөніндегі іс-шаралардың жалғасатынын хабарлады.