![Әлеуметтік дәмхана қызметкерлерімен кездесті](/media/2020/08/03/2-.jpg)
Көмек аясында Сенат Төрағасы Мәулен Әшімбаев елордамыздағы «әлеуметтік» дәмханаға арнайы барып, мекеменің ұжымымен кездесті. Бұл жерде ерекше қажеттілігі бар және әлеуметтік қорғалмаған санаттағы азаматтар жұмыс істейді.
Соңғы жылдары елімізде «әлеуметтік кәсіпкерлік» саласы жаңаша қарқынмен дамып келеді. Бейресми мәліметке сүйенсек, қазіргі таңда Қазақстанда 200-ге жуық әлеуметтік бизнес нысаны халыққа түрлі қызмет көрсетеді. Алайда бұл сала әзірге заңнамалық тұрғыдан реттелмеген. Өз сөзінде Мәулен Әшімбаев алдағы уақытта осы бағыттағы жұмыстар қолға алынатынын айтты.
– Мемлекет басшысы жыл басында әлеуметтік кәсіпкерлермен арнайы кездескен болатын. Сол кезде Эмин Аскеровтің және басқа да кәсіпкерлердің барлық ұсыныстарына қолдау білдірді. Алдағы уақытта біз Қазақстанда осындай дәмханалар мен кәсіпорындар көптеп ашылуы үшін кәсіптің бұл түрін заңнамалық тұрғыдан реттеуге қажетті көмек көрсетеміз. Қазір әлеуметтік кәсіпкерлер өз күштерімен еңбек етіп жүр. Бірақ оларды қолдау үшін тиісті заңдар қабылдау керек. Біз осы бағытта да жұмыс істейтін боламыз, – деді Сенат Төрағасы.
Сонымен қатар ол осы күндері көптеген қазақстандықтардың мұқтаж жандарға белсенді түрде қолдау көрсетіп жатқанына назар аударды.
– Құрбан айт қайырымдылық пен мейірімділікті дәріптейтін мейрам. Сондықтан бұл күндері бір-бірімізге жақсылық жасаудың маңызы зор. Әсіресе бүгінгідей пандемия жағдайында мұқтаж жандарға қолдау көрсетудің және оларға көмек қолын созудың мәні ерекше. Сондықтан қазіргі таңда азаматтарымыздың ұлтына, дініне қарамай, өзара қайырымдылық жасап, көмектесіп жатқанын айрықша атап өткен жөн. Әсіресе волонтерлер белсенділік танытуда. Бұл қоғамның біртұтастығын көрсетеді, – деді Мәулен Әшімбаев.
Сенат Төрағасы дәмхана қызметкерлерін Құрбан айт мерекесімен құттықтап, олардың әрқайсысына құрбандықтың еті салынған азық-түлік қоржыны мен естелік сыйлықтар тарту етті. Сондай-ақ Сенат Төрағасы әлеуметтік дәмхананың басшысы Эмин Аскеровке ерекше қажеттілігі бар жандарды жұмыспен қамтығаны үшін алғыс білдірді.
– Жалпы, мұндай қолдауға мүмкіндігі шектеулі жандар ерекше мұқтаж екені белгілі. Алайда біз оларға тек көмек беріп қана қоймай, қоғамға бейімделуіне жағдай жасауымыз керек. Олардың жұмысқа қабілеттілері адал еңбекпен ақша табуына, бір-бірімен араласуына, ортаға үйреніп, отбасын құруға және өзін өзі дамытуға мүмкіндік туғызуы қажет. Осы тұрғыдан келгенде Эмин Аскеров үлкен жұмыс атқарып отыр, – деді Сенат Төрағасы.
Айта кетейік, аталған дәмхана карантин кезінде де жұмысын жалғастырып жатыр. Тапсырысты тұтынушыларға жеткізіп беру ісі ұйымдастырылған және келген қонақтарға тек ашық аспан астында қызмет көрсетіледі. Барлық сақтық шаралары мен санитарлық талаптар қатаң сақталғанын да атап өткен жөн.
Эмин Аскеров бірнеше әлеуметтік кәсіпорын ашып, елімізде осы бағыттың жандануына үлкен үлес қосып келе жатқан кәсіпкерлердің бірі. Ол ашқан кәсіпорындарда мүмкіндігі шектеулі жандар, үйсіз жүргендер, бұрын сотталғандар және түрлі тәуелділікке шалдыққандар жұмыс істейді. Олар өз қабілеттерін тігін цехында, жиһаз фабрикасында, автокөлік жуу орнында және дәмханада пайдаға жаратуда.
Айт күндері сенаторлар басқа да түрлі қайырымдылық шараларына белсене қатысуда. Атап айтқанда, Сенат тарапынан Қазақстан мұсылмандары діни басқармасы мен «Зекет» қоры ұйымдастырған құрбандық шалу рәсімін онлайн-форматта өткізу бастамасына қолдау көрсетілді. Соған байланысты Палатаның бірқатар депутаты мен аппарат қызметкерлері qurban2020.kz сайтының қызметіне жүгініп, құрбандық шалуға ниет етті.
Биыл көп салаға пандемияның кері әсері тигені белгілі. Соның ішінде діни мейрамдарды атап өту форматы да өзгеріске ұшырап жатыр. Алайда бұл келеңсіздік азаматтардың қайырымдылықпен айналысуына ешқандай тосқауыл бола алмайды. Сондықтан биыл да жылдағы дәстүр бойынша құрбандықтың еті мұқтаж жандарға таратылуда.
Сенаторлардың бастамасымен еттің бір бөлігі індетпен күресіп, халықтың денсаулығы үшін аянбай еңбек етіп жүрген медициналық қызметкерлердің отбасыларына да берілетін болды. Қазіргідей күрделі кезеңде оларды қолдау үшін Сенат аппаратының қызметкерлері елордалық дәрігерлер Смағұловтар отбасына барып, айтпен құттықтады және балаларына жаңа оқу жылында қашықтан оқуға қажетті компьютер сыйлады.