«Сау болайық!» сақтыққа шақырады

Руханият • 07 Тамыз, 2020

«Сау болайық!» сақтыққа шақырады

58 рет көрсетілді

«Қазақстан» телерадиокорпорациясы коронавируспен күресудің жолдарын түсіндіретін тағы бір бағдарламаны эфирге шығарды. Корпорация құрамындағы «Balapan» телеарнасынан балаларға арналған «Сау болайық!» жаңа жобасы көрсетіле бастады.

Мирас АСАН

Арна басшылығы атап кеткендей, хабардың мақсаты – кішкентай көрермендерге денсаулыққа қатысты маңызды ақпаратты ойын түрінде бере отырып, салауатты өмір салтын насихаттау. Пандемия кезінде тұтас әлем коронавируспен күресіп, денсаулықты күту бірінші орынға шықты. Жоба кішкентай көрермендерге «денсаулық – зор байлық» екенін ұғындыруды мақсат етеді. Көгілдір экранға жаңа шыққан тың айдар карантин режімінде қауіпсіздік шараларын сақтаудың маңызы туралы түсіндіріп, спортпен дос болуға шақырады.

Бұған дейін «Маусым айынан бастап «Qazaqstan» телеарнасынан бес күн бойы тікелей эфирде «Теледәрігер» жобасы шыға бастағаны да айта кеткен жөн. Жалпы, бұл пандемия көрсетіп бергендей дәл қазіргі кезеңде ел тұрғындарына, әсіресе шалғай ауыл-аймақтағы көрерменге қазіргі күрделі ахуалға байланысты күнделікті медициналық кеңес беру өте өзекті болып отыр. Жоғарыдағы жаңа жобалар арқылы дәрігерлер тікелей эфир барысында COVID-19 вирусы мен өзге де аурулардан сақтану мен алдын алу шаралары, емдеу тәсілдері туралы нұсқаулық береді.

Алайда бұл тұрғыда балалардың да көкейінде түрлі сұрақтардың туындайтыны сөзсіз. Үлкендер өз алдына, балаларды індеттен қорғау – басты мәселе. Ол ата-аналардың жауапкершілігімен қатар, кішкентайлардың өзіне аурудың қаупін түсіндіре отырып жүзеге асырылатыны сөзсіз. «Balapan» арнасы осы іске атсалысуды көздейді. «Бұл жоба «Қазақстан» телерадиокорпорациясының осы бағыттағы ақпараттандыру шараларының жалғасы», деп хабарлайды Телерадиокорпорацияның Баспасөз қызметі.

«Сау болайық!» тележобасы эфирге аптасына үш рет дүйсенбі, сәрсенбі, жұма күндері сағат 12:00-де және 19:25-те шығады. Бағдарламаның «Керек дерек» айдарында медицина саласына қатысты терминдер жеңіл тілмен түсіндірілсе, «Шымыр бол!» айдарында түрлі жаттығулар көрсетіледі. «Жатта, есте сақта!» бөлімі бағдарлама қорытындысы ретінде сұрақ-жауап түрінде өтеді.

Жаңа жобаның ерекшелігі, бағдарламаға экран алдында отырған көрермендер де атсалыса алады. Ол үшін жаттығу жасап, арнаның ресми парақшасын белгілеп, әлеуметтік желіге жүктеу қажет. Ең үздік бейне жаттығу «Шымыр бол!» айдарында көрсетіледі.

Жоба «Balapan» арнасының эфирінен жыл соңына дейін жалғаспақ.

Күннің маңызды және өзекті жаңалықтарын «Егемен Қазақстан» телеграм каналынан оқыңыз