Алматыда зиялы қауым өкілдері Абай ескерткішіне гүл шоқтарын қойды

Абай • 10 Тамыз, 2020

Алматыда зиялы қауым өкілдері Абай ескерткішіне гүл шоқтарын қойды

33 рет көрсетілді

Алматы қаласында зиялы қауым өкілдері Абай ескерткішіне гүл шоқтарын қойып, ұлы хәкімнің рухына тағзым етті, - деп хабарлайды Egemen.kz.

Эльвира СЕРІКҚЫЗЫ

Абай алаңында өткен шараға шаһар әкімі Бақытжан Сағынтаев, академик Мекемтас Мырзахметов, белгілі қаламгерлер Олжас Сүлейменов, Мұрат Әуезов, Роллан Сейсенбаев, М.Әуезов атындағы Әдебиет және өнер институтының директоры Кенжехан Матыжанов, Қазақстан Жазушылар одағы төрағасының бірінші орынбасары Ақберен Елгезек қатысты.

Ұлы ақынның асыл мұрасын насихаттау мен жас ұрпақ бойына сіңірудегі игі істің жалғасындай еліміздің барлық өңірлерінде Абай күнін атап өтуге байланысты жоспарланған жүздеген шаралар өтуде. Алдағы уақытта Президент тапсырмасына орай гуманитарлық пәндердің бөлінбес бөлшегі ретінде "Абайтану" курсын оқыту, сонымен қатар жаңа философиялық және саяси ұстаным тұрғысынан "Абайтану" оқулығы мен хрестоматиясы әзірленетін болады. Бұл бағытта жүргізілетін зерттеу жұмыстары еліміздің ғалымдары үшін де Абай әлемін тереңнен тануға мүмкіндік береді.

Қала әкімі "Абайдың туған күні ресми мереке болып белгіленді. Бұл күн қазақтың мәдениетін, әдебиеті мен поэзиясын бейнелейді. Президент жариялаған ұлы ойшыл және жазушының 175 жылдығы ақынның поэтикалық, философиялық еңбектерінің ғылыми-зерттеу жұмысын жандандырмақ. Абайдың мұрасы әлі зерттелу керек. Бұл ретте Ұлы Абай айтқан принциптер, яғни еңбекқорлық, білімге деген құштарлық, адамзатты сүю мен ой тазалығы туралы пікірлері өзектілігін жоймайды. Абай күні құтты болсын!" - деп жазды жеке парақшасында.

Абайдың баға бетпес мол мұрасы тарихы, мәдениеті мен әдебиетін ту еткен халық үшін ұлттық санасы, руханиятының қайта жаңғыруының, қоғамның өркениет кеңістігіне ұмтылысындағы қозғаушы күші ретіндегі рөлі зор.

АЛМАТЫ