Алматы қаласындағы Перинатология және балалар кардиохирургиясы орталығы қандай қарқында жұмыс істеп жатыр? Бұл туралы онлайн-сұхбат барысында осы ме­ди­циналық мекеменің директоры Ғани Боды­қов баяндады.

Мегаполистегі осы медициналық орта­лық­тың ерекшелігі де сонда, жыл сайын мұнда 8-8,5 мың әйел босанса, олардың 10-12 пайызы мерзімінен ерте туады. Ал ақ ха­латтылар денсаулықтарында кінәраты бар және жүрек ақауларымен келген сәбилердің денсаулығы үшін күреседі.

Пандемияға байланысты орталық ғима­ра­тында ЖРВИ мен коронавирустық індет жұқтырған пациенттер үшін инфекциялық-провизорлық бөлім ұйымдастырылған. Тек соңғы екі аптада орталықта індетке шал­дыққан 41 пациент ем қабылдаса, 33 аяғы ауыр әйел COVID-19 инфекциясынан толық сауығып шыққан. Емдеу барысында 16 адам босанса, олардың 9-ына кесер тілігі жасалыныпты. Індет жұқтырған немесе пневмонияға шалдыққан жүкті әйелдерді емдеудің қиындығы сонда, олардың кеселі ауыр акушерлік патологиямен қатар жүреді және қалайда құрсақтағы сәбиді сақтап қа­лу­­дың барлық жолдарын қарастыру қажет.

Айта кету керек, бүгінгі таңда кардио­хи­­рургтер коронавирус пандемиясына бай­­ланысты пациенттерін емдемес бұ­рын, өздерінің де қауіпсіздіктеріне де көп кө­ңіл бөлуі керек. Осы орайда, алды­мен Ғани Бодықов провизорлық бөлім қыз­мет­керлері үшін қауіпсіз еңбек шарттары жасалғанын және науқастар барлық дәрі­лер­мен қамтамасыз етілгенін атап өтті.

Күн сайын барлық қызметкерлерге термометрия жүргізіледі. Дәрігерлер жұ­мыс­та барлық қажетті жеке қорғаныш құ­рал­дарымен қамтамасыз етілген. Бір реттік маскалар мен қорғаныш костюмдері, бір реттік халаттарды және экрандарды, де­зин­фек­циялық құралдары бар сани­тай­зер­лер­ді барлық қабат пен жұмыс каби­не­тін­де қол­да­ну мәселесі қадағаланады.

– Пандемия жағдайында орталық аума­ғын­да коронавирус науқастарын емдеу үшін 25 провизорлық және 5 инфекциялық төсек-орын қойылған. Провизорлық бөлім қыз­меткерлері үшін қауіпсіз еңбек жағдайы жасалып, мотивация жүйесі ойластырылған. Бар­лығына қонақүй нөмірлері, трансфер, 3 реттік тамақ беріледі. Орталықта қыз­мет­кер­лерге көшеден кіретін шлюздары, киім ауыстыратын аймағы, жуынатын орны мен қолданылған жеке қорғаныс құралдарын жоятын аймағы бар жеке кіретін орын қарастырылған. Таза (жасыл) аймақта ординаторлар, демалатын және тамақтанатын орындар бар, – дейді орталық басшысы.

Барлық әйелдер (екі аптада 40-тан астам) қабынуға қарсы, антибактериалды, антикоагулянтты, сонымен бірге Денсаулық сақтау министрлігі ұсынған клини­ка­лық хаттамаға сәйкес, оксигенотерапия қабылдайды. Пневмонияны емдеу үшін қажетті 1,5-2 айға жететін толық көлемді препараттар бар.

Ғани Бодықовтың айтуынша, қар­ба­лас жұмысқа қарамастан, медицина қыз­меткерлерінің біліктілігін арттыруға себепкер болатын персоналды оқыту жұ­мыс­тары да қосымша жүрігізіледі. Қазір­гі уа­қытта провизорлық бөлімнің 4 дәрігері Оқу-әдістемелік орталықтың базасында «Жүктілік, босану және коронавирус инфекциясы» тақырыбында онлайн оқудан өтіп жатыр. Сонымен бірге орталықта КВИ диагнос­тикалау және емдеу, дәрігерлер, медицина мейірбикелері және кіші медициналық персонал үшін ЖҚҚ кигізу және шешу бойынша семинар-тренингтер жүйелі түрде өткізіледі.

– Мамандарды даярлау бойынша жұмыс жүргізілуде. Алматы қалалық қоғамдық денсаулық сақтау басқармасы ұйғарымымен құрылған жоғары медициналық колледжінде тәжірибелік денсаулық сақтау мамандарына арналған білім беретін Оқу-әдістемелік орталығы жұмыс істейді. Қазір провизорлық бөлімшенің 4 дәрігері осы орталықта «Жүктілік, босану және коронавирустық инфекция» тақырыбында онлайн режімде білім алуда, – деді Перинатология және балалар кардиохирургиясы орталығының директоры.

Орталықтың эпидемиялық қызметі дәрі­герлерге, мейірбикелерге және кіші ме­ди­ци­налық персоналға КВИ диагнозын қою және емдеу, оқу-жаттығу киімдерін кию және жеке құрамға арналған оқыту семинар­ларын үнемі өткізіп тұрады.

– Пандемия мен қауіптің жоғарылауына қарамастан, орталықта Алматы қаласының барлық аймағындағы жүкті, босанған әйелдерге және босану қаупі жоғары әйел­дер­ге жоғары білікті көмек көрсету жалға­сып жатыр. Күніне 30-50 науқас ауруханаға жатқызылса, 30-45 жүкті әйел өмірге сәби әке­леді. Ал олардың 35%-ы жедел босанса, күр­делі патологиясы бар нәрестелер ем­де­ле­ді, – дейді орталық директоры.

Ең бастысы, пандемия кезінде де орта­лық міндетінен жаңылған жоқ. Ана мен ба­ланың денсаулығын жақсарту арқылы са­ламатты болашақ үшін күресуде. Пери­на­тология және балалар кардиохирургия­сы орталығының қызметкерлері кез келген жағдайда Гиппократ антын орындауға да­йын.

АЛМАТЫ