Сол байқауда маған бірінші орын бұйырды. Қазылар алқасының төрағасы Шәмші Қалдаяқов екен. Ол кісі солайша ең жас және талантты әнші ретінде қолдап, өнеріме сәт-сапар тілеген еді. Бұл оқиға менің көңілімде ұмытылмастай сақталды. Екінші бір естен шықпайтын оқиға – 1991 жылы тағы бір үлкен республикалық байқауда Шәмші Қалдаяқовтың әндерін орындадым. Шәмші аға менің орындауыма соншалықты риза болды. Сахнаға шығып, қолымды көтеріп, баладай қуанғаны әлі есімде. Дәл сол сәттегі кадр композиторға арнап түсірілген деректі фильмдерде бар.
Шәмші ағаның көптеген әндерін сүйіп орындаймын. Осыдан біраз уақыт бұрын демеушілердің көмегімен тек қана сол кісінің әндерінен тұратын ән дискісін шығарғанымды айтқым келеді. Әсіресе сол көп әннің ішінде «Әнім сен едің», «Кешікпей келем деп ең» дейтін әндерін жиі айтамын. Шәмші Қалдаяқовтың есімі оның музыкасын сүйетін, қадірлейтін жандардың есінен шықпақ емес. Ол өзінің тамаша, қайталанбас әндерімен біздің жүрегімізде, яғни қазақ халқының жүрегінде мәңгі жасайды деп ойлаймын. Өйткені ол халық композиторы, есімі халық ұғымымен тұтасып кеткен тұлға.
Роза РЫМБАЕВА,
Қазақстанның халық әртісі,
Мемлекеттік сыйлықтың лауреаты
