Саясат • 19 Тамыз, 2020

Праймериз: Бәсекелестіктің бәсі басым

502 рет
көрсетілді
6 мин
оқу үшін

Кеше елімізде Nur Otan праймеризі басталғаны туралы хабарлаған болатынбыз. Халықтың барын бағамдап, жоғын түгендей білетін белсенді азаматтардың белін бууға негізделген бұл партияішілік таңдаудың тиімді тетігінен күтеріміз көп.

Праймериз: Бәсекелестіктің бәсі басым

Себебі бастауыш пар­тия­ның пәрменін арттырып, елдің сенімінен, халықтың үдесі­нен шыға білетін талабы тау қо­паралық көшбасшылар мемлекетке ауадай қажет. Ал Nur Otan партиясы ұсынған мәліметке үңілсек, партияға адал қызмет етуге бел байлаған ондай үміткер­лердің қатары күн санап толығып келеді.

«Мықты лидерлер – Мықты партия» қағидаты бойынша нақты әрі мықты көшбасшыларды анықтау мен оларды ел ісіне тар­туды міндет еткен бұл баста­ма әйел азаматтардың да үле­сін ұмыт қалдырған жоқ. Прай­мериз өткізудің ережесінде партиялық тізімдерде кем дегенде 30% әйелдердің, көпбалалы ана­лардың болуы айтылған еді. Ереже ескерусіз қалмаған тәрізді. Мәселен, праймериз басталған алғашқы күні-ақ тіркеуге өтініш білдірген үміткерлердің саны 1000-нан асқан болса, сол 1000 кандидаттың 336-сы әйел азаматтар. Соның ішінде 20 көпбалалы ана бар. Сонымен қатар 35 жасқа дейінгі 228 жастың, ерекше қажеттілігі бар 8 азаматтың есі­мін үміткерлер тізімінен кө­руге болады. Бастауыш партия ұйымдарынан 322 адам ұсы­ныл­са, 717 кандидат өзін-өзі ұсынды.

Ең бастысы, праймериз бас­­тауыш партияның қайта жаңғыруының нәтижесі болатыны­на үлкен үміт артылуда. Бұл ту­ралы Елбасы Нұрсұлтан Назарбаев прай­мериздің басталуына бай­ла­нысты Үндеуінде «Бүкіл еліміз бо­йынша ауқымды праймериз өт­­кізу биліктегі партияның «қай­та жаңғыруының» нəтижесі бола­ды. Бұл – партия ішілік сайлау. Бұл шынайы əлеуметтік лифт. Қа­таң іріктеу, жаңа идеялар мен жо­баларды іздеу. Бұл идеяны көп­те­ген белгілі саясаттанушылар мен қо­ғам белсенділері қолдады. Бұ­лар белсенді азаматтық ұстаны­мы бар, Nur Otan-ды қолдаушы­лар ли­гасына біріккен жəне рефор­­маларға қатысуға дайын адам­дар. Біз партия ішіндегі ашық­тық пен есептілік үшін қажетті жағ­дайларды жасадық. Ең бас­тысы – ашықтық пен адалдық, барлық қаты­сушылар үшін тең жағдайлар мен бəсекелестік», деп айрықша атап өткен еді.

Бәсекелестік бар жерде белсенділік те, табанды тартыс та болады. Кандидаттар өз сайлаушыларының үдесінен шығып, халықтың артып отырған үмітін ақтау үшін барын салатыны белгілі. Сондықтан тұңғыш рет республикалық партияішілік сай­лау ауқымында өтетін праймеризге өз ісіне сенімді, жалынды азаматтар қатысады деп таразылай­мыз. Қазақстанның Тұңғыш Президентінің бас­тамасымен қолға алынған «Сенім. Диалог. Болашаққа нық қадам» – партия жұмысын «қайта жандан­дыру» бағдарламасының қорытын­ды кезеңдерінің бірі саналатын прай­меризді Nur Otan партиясы Төраға­сының бірінші орынбасары Бауыржан Байбек те айрықша назарға алып отыр.

Ол өзінің Facebook-тегі жеке парақ­шасында «Елбасы Нұрсұлтан Назарбаев кешегі Үндеуінде атап өткен­дей, партия өз ісінің шебер­лерін, ел тағдырына алаңдайтын тұлға­ларды, шешім қабылдай алатын және конструктивті ұсыныстар жасай алатын жаңа азаматтарды билік­ке ұсынатын қайнар көз болуы тиіс. Партияішілік сайлаудың ашық әрі әділ өтуіне партия тарапынан қа­жет­­ті жағдай жасалған. Бастысы – ай­­қын­дық пен тазалықты, барлық қаты­су­­шыларға тең мүмкіндік пен бәсе­­ке­­лестікті қамтамасыз ету. Пар­тия Ли­дері азаматтарды толғанды­рып жүр­­ген көкейкесті мәселелердің өзара сенім мен сыйластық аясында көтерілетініне сенім білдірді. Көтеріл­ген мәсе­лелерді партия бақы­лауға алуы тиіс. Әр­бір ауданның, қал­аның, облыс­тың сай­лауал­ды бағ­дарламасына енгізу үшін барлық шешімді бюд­жеттің мүм­кін­­дік­терімен үйлестіре қарастыру қажет», деп оқырмандарымен ой бөліседі.

Оның айтуынша, еліміздің алдында пандемиядан кейін экономикалық өсімді қалпына келтіру, жұмыс орындарын құру, шағын және орта бизнестің жұмысын жандандыру міндеттері тұр. Сонымен бірге пандемиямен күрес мәселелерін талдап, оның екінші толқыны орын алуы мүмкін жағдайға дайындалу қажет. Мұның барлығы партияның сайлауалды бағдарламасына енгізі­ліп, нұротандықтардың алдағы 5 жылда атқаратын іс-әрекеттеріне бағыт-бағдар болады. «Тағы да барлық партиялықтар мен Nur Otan жақтас­тарын елдегі аса маңызды саяси додаға белсенді қатысуға шақы­рамын!», деп жазады Б.Байбек.

Праймериз нәтижесі ең алдымен бастауыш партияның аймақтардағы филиалдарының жұмысын жандандырады деген сенім бар. Еліміз бойынша халық барынша тығыз қоныстанған аймақ ретінде Түркістан облысын айтуға болар еді. Nur Otan партия­сы Түркістан облыстық филиалы төрағасының бірінші орынбасары Бейсен Тәжібаевтың айтуынша, өңірде праймеризге дайындық талапқа сай жүргізілуде. Ол кадрлық резервте әйелдердің үлесін кем дегенде 30, ал жастардың үлесін 20 пайызға жеткізу бастамасы қоғам тарапынан қолдауға ие болғанын алға тартып отыр. «Партия Төрағасы, Елбасы Н.Назарбаевтың «Сенім. Диалог. Болашаққа нық қадам» атты партия жұмысын жүйелі жаңғырту бағдарламасына сәйкес қолға алынған праймеризде әйелдер мен жастар қауымына да үлкен мүмкіндік беріліп отыр. Праймериздің алғаш­қы күні түркістандық жастар­дың белсенділігі байқалды. Әлі де қатысуға ниет білдіріп жатқандары көп. Біз осы азаматтар арасынан елге жанашыр, нағыз патриоттарды іріктеп алуымыз керек», дейді Б.Тәжібаев.

Ілгері қадамның іріктеуден бас­талатынын ескерсек, праймеризге тіркеліп, бабы мен бағын сынап жатқан ел азаматтарының саны күн санап артып келе жатқаны қуантады. Ел игілігі жолында ерінбей еңбек етуге бел буған ондай азаматтарға сайлау­шылары да тиісті қолдауын білдіреді деген сенімдеміз.