Аталған ауруханада COVID-19 бен пневмония диагнозы қойылған бірде-бір науқас қалмады. Енді №4 қалалық клиникалық ауруханасының жұқпалы аурулар бөлімшесіне дезинфекциялық жұмыстар жүргізіледі. Сондай-ақ аурухананың медициналық қызметкерлері екі апта бойы оқшауланып, содан кейін өздерінің бейінді бөлімшелеріне – бұрынғы жұмыстарына оралады.
«Бір апта бойы температурам 39,8°C-қа дейін көтеріліп, кеуде тұсымды қатты ауырсындым. Ауа жетіспеушілігі, құрғақ жөтел, әлсіздік пен ентігу болды. Ауруханаға өздігімнен қабылдау бөлмесіне келіп, тексерілгенімде дереу КТ жасап, ауруханаға жатқызды. Маған екі жақты полисегменттік пневмония диагнозы қойылды. Дәрігерлер қамқорлық танытып, инъекциялар мен аспа уколдарды өте мұқият қойды. Екі аптадан кейін қайтадан иіс сезе бастадым», дейді «Төрттік» стационарында емделген Жұмаділ Әкімбеков.
Биыл 24 маусымда Алматы қаласының Қоғамдық денсаулық сақтау басқармасы мен Тауарлар мен көрсетілетін қызметтердің сапасы мен қауіпсіздігін бақылау департаментінің бірлескен бұйрығы негізінде №4 ҚКА-да 25 төсектік орын бар жұқпалы аурулар бөлімшесі ашылды. Сол кезде жоспарлы медициналық көмек көрсету тоқтатылды, физиотерапия және оңалту бөлімшесін қайта бейіндеу есебінен ковидтік бөлімше құрылды. Клиниканың еріктілері қатарынан 44 адамнан тұратын медициналық қызметкерлер алынды.
«Жаңа жұқпалы аурулар бөлімшесіне жұмысқа қабылдау туралы хабарламадан соң көпшілігі ойланбастан өтініш берді. Бастапқыда 14 дәрігер жұмыс істеді, оның ішінде 4 реаниматолог, қалған 10 дәрігер құрама команда: травматолог, инфекционист, терапевт, реабилитолог дәрігер, ФГДС дәрігері, УДЗ диагностикасы бар. Қалғаны медбикелер мен санитарлар, сондай-ақ еріктілер. Бөлімшеде 25 төсектік орынға және 5 реанимациялық орынға есептелген, ауру өршіген шақта шындығында 70-ке дейін ауыр науқас жатты», дейді жұқпалы аурулар бөлімшесінің меңгерушісі Нұржан Байбахов.
Пандемия дәрігердің өмірін «дейін» және «кейін» деп бөлді. Нұржан Нұрмұханбетұлы – білікті травматолог-ортопед, хирург, эндопротездеу бөлімшесінде жұмыс істейді, буындарды эндопротездеу маманы. Жұқпалы аурулар бөлімшесінің қызметкерлері отбасынан оқшауланып, қонақүйге көшті. Алғы шепте жұмыс істейтін дәрігерлерді жұмысқа апарып, алып қайту, рестораторлар клубынан ыстық тамақ, демеушілерден азық-түлік себеттері беріліп, ерекше жағдай жасалды.
Осы уақыт ішінде бөлімшеде 126 адам емделді. Қалалық клиникалық ауруханаға пневмониямен ауырған ауыр науқастар жатқызылды. Реанимация, анестезиология және қарқынды терапия бөлімшесінің аға медбикесі Айжан Омарованың дағдысы мен тәжірибесі инфекциялық бөлімшеде жұмыс істеуде өз пайдасын тигізді, ол да еріктілер қатарында болды. Соңғы науқас шыққан күні Айжан осы уақытқа дейін тапсырған барлық ПТР тесті теріс нәтиже көрсеткенін атап өтті.
«Осы уақыт аралығында бізге өте қиын болды. Пациенттердің басым бөлігі тыныс алуы қиындаған, ауыр халде болды, барлығы қабылдау бөлімшесі арқылы келіп түсті. Өте ауыр жағдайдағы науқастар дереу реанимация бөліміне жатқызылды, ауырлығы орташа және ПТР тесті оң болғандар біздің жұқпалы аурулар бөлімшесіне жіберілді. Қызметкерлерге үлкен психоэмоциональды ауырлық түсті, науқастар моральдық тұрғыдан шаршап, байбалам салғандар да болды, кейбірінде емдеу процесі өте қиын жағдайда өтті. Біз оларды тыныштандырып, бір-бірімізді жігерлендіріп, бақылап жүрдік. Кейінірек, инфекция төмендеген кезде, жеңістің жақындағанын түсіндік. Енді қалыпты өмірге қайта оралып жатырмыз», деді №4 ҚКА жұқпалы аурулар бөлімшесінің аға медбикесі Айжан Омарова.
Соңғы науқасты шығарғаннан кейін жұқпалы аурулар бөлімшесінің медициналық қызметкерлері қорғаныс костюмдерін шешіп, дәрігерлер екі апталық өзін өзі оқшаулауға кетеді, адамдардың өмірі үшін қызу күрестен кейінгі демалыс уақыты келді. Карантиннен кейін ПТР тестін міндетті түрде тапсыру қажет, егер теріс нәтиже болса, олар өздерінің мамандандырылған бөлімшелеріне бұрынғы жұмысына оралады.
Айта кетейік, коронавирус инфекциясының таралу қаупі жағдайында Алматы қаласының медициналық ұйымдары эпидемияға қарсы қауіпсіздік талаптарын сақтай отырып, карантин режімінде жұмыс істеуді жалғастырып отыр.
АЛМАТЫ
