Алматыда заңсыз ағаш кескені үшін жер телімінің иесі жауапқа тартылды

Аймақтар • 26 Тамыз, 2020

Алматыда заңсыз ағаш кескені үшін жер телімінің иесі жауапқа тартылды

31 рет көрсетілді

Алматы әкімі Бақытжан Сағынтаев Көктөбе тауы аумағында ағашты заңсыз кескені үшін жер телімі иесінің жауапкершілікке тартылғаны туралы айтты, деп хабарлайды Egemen.kz.

Арман ОКТЯБРЬ

Қала әкімі Б. Сағынтаев "Алматы" ТА-ның Akimat Live бағдарламасының тікелей эфирінде Медеу ауданында ағаштарды заңсыз кесу фактілеріне жүргізілген тексерудің нәтижесі туралы хабарлады.

Бірнеше адам иелік ететін аумақта жасыл желектерді заңсыз кесу анықталған. Олардың біреуі белгілі болды және оған ҚР ӘҚ кодексінің 386 бабы бойынша 117 жасыл желекті заңсыз кескені үшін 15 АЕК (41 670 теңге) айыппұл салынды. Сонымен қатар, абаттандыру ережелерін бұзғаны үшін ол 50 АЕК (138 900 теңге) көлемінде айыппұл төлейтін болды.

Он есе өтемдік отырғызу (1170 мың ағаш) белгіленді. Сонымен қатар, қойылатын талаптарға сәйкес жапырақ сұрыпты ағаштың биіктігі жер бетінен кемінде 3 м биік болуы тиіс. Бұдан өзге, екі жыл қатарынан ол ағаштарды күтіп-баптауы қажет. Өтемдік отырғызу күз мезгілінде орта мектептердің жанына және көшелер бойына ағаш отырғызумен басталады. Қураған ағаштардың орнына жаңалары отырғызылады.

Ағашты заңсыз кескен адаммен хаттаманы толтырған кезде өтемдік отырғызу және жасыл желекке екі жыл қатарынан күтім жасау туралы белгілі бір ұйыммен кепілдеме жасалады және кепіл хат беріледі.

Жасыл желекті заңсыз кескен жер телімдерінің иелері анықталуда.

"Ағашты заңсыз кесу және жасыл желекке зиян келтіретін проблеманы жұртшылықты кеңінен тарта отырып шешетін боламыз", деп атап өтті Б.Сағынтаев.

Ағаштарды заңсыз кескендерді, олардың түбіне, діңгегіне зиян келтіргендерді анықтайтын "Жасыл бақылау" жобасы қолға алынады және заңсыз әрекеттерге мониторинг жүргізіледі.

Күннің маңызды және өзекті жаңалықтарын «Егемен Қазақстан» телеграм каналынан оқыңыз