2020 жылғы 20 тамыздағы жағдай бойынша Нұр-Сұлтан қаласындағы жарналар мен аударымдарды төлеуден босатылған кәсіпорындар жұмыскерлерінің 64,8%-ның ақпараттары жаңартылмаған. Егер жұмыс беруші деректерді енгізбесе, қыркүйек айында ШОБ қызметкерлерінің бір бөлігі жүйеде сақтандырылмаған болуы мүмкін деген қауіп бар.
«Елордамыздың шағын және орта бизнес субъектілеріндегі жұмыс берушілер өз қызметкерлері үшін жауапты екендерін түсінуі қажет. Олардан осы кәсіпорындардағы қызметкерлер сақтандырылып, МӘМС жүйесінде барлық қажетті медициналық көмектерді алуы үшін жұмыскерлерінің тізімдерін үнемі жаңартып отыруын сұраймыз. Осы бағытта «Атамекен» ҰКП, Мемлекеттік кіріс комитеті және олардың аймақтардағы ұйымдарымен бірлесе отырып, ақпараттық-түсіндіру жұмыстарын жүргізудеміз», дейді «Әлеуметтік медициналық сақтандыру қоры» КеАҚ Нұр-Сұлтан қаласы бойынша филиалы директорының орынбасары Айнагүл Дәулетшина.
Естеріңізге сала кетейік, алгоритмге сәйкес жұмыс беруші әр айдың 25-не дейін мына сілтемеге https://msb.fms.kz/login өтіп, БСН бойынша тізімнен өз ұйымын тауып, заңды тұлғаның немесе жеке кәсіпкердің ЭЦҚ көмегімен Қордың ақпараттық жүйесіне тіркеліп, пайдаланушы келісіміне қол қоюы керек. Бұдан әрі МӘМС төлемдерін төлеуден босатылған қызметкерлердің ЖСН-ін (Excel-де бір файлмен немесе әр қызметкерді жолма-жол) қосады. Кейіннен деректерді қайта енгізудің қажеті жоқ, оны тек жаңартып отыру керек. Ақпарат ай сайын Мемлекеттік кірістер комитетіне беріледі.
Егер шағын және орта бизнес субъектісінің қызметкері өз мәртебесінің сақтандырылмағанын білсе, онда ол деректерді Qoldau 24/7 мобильді қосымшасы арқылы өзі жібере алады. Электронды мекенжайын, тегін, ЖСН, телефон нөмірін көрсете отырып, ШОБ субъектісінің атауын, жұмыс берушінің БСН/ЖСН-ін көрсете отырып, өтінішті ресімдеу және еңбек шартын немесе тағайындау туралы бұйрықты қоса тіркеу қажет. Деректер сәйкестігі расталған қызметкерге бір айға уақытша мәртебе беріледі. Алайда қызметкер өзі туралы мәліметтерді ақпараттық жүйеге енгізу қажеттілігі туралы жұмыс берушіге ескертуі керек.
