«Қазақстан» орталық концерт залында Шәмші Қалдаяқов атындағы «Менің Қазақстаным» халықаралық ән фестиваліне қатысушылардың гала-концерті өтті.
Ұлы сазгердің жүрек қылын тербейтін баға жетпес әндерін тыңдауға аға буын өкілдері ғана емес, жастар да көп жиылды.
«Қазақстан» орталық концерт залында Шәмші Қалдаяқов атындағы «Менің Қазақстаным» халықаралық ән фестиваліне қатысушылардың гала-концерті өтті.
Ұлы сазгердің жүрек қылын тербейтін баға жетпес әндерін тыңдауға аға буын өкілдері ғана емес, жастар да көп жиылды.Кеш шымылдығы Ерлан Бақтыгереев дирижерлік еткен Астана мемлекеттік филармониясы оркестрінің орындауындағы Шәмші Қалдаяқов әндерінен құралған попуримен және «Шолпан» би ансамблінің биімен ашылды.
Көрнекті композитордың 300-ден аса әндері болса, соның барлығы халық жүрегінен өз орнын тапқан. Бүгінде ешбір той, ешбір мейрам Шәмші ағаның әндерінсіз өтпейді. Композиторды білмейтін, оның әндерін сүйіп тыңдамайтын қазақ жоқ та шығар. Гала-концертте алғаш болып М. Шахановтың сөзіне жазылған «Ақ бантик» әнін Роман Ким, ал «Өмір-өзен» әнін «Х фактор» байқауының финалисі Айнұр Ешманова шырқады. Шәмші ағаның жан жары Жәмила апайға арнаған атақты «Бәрінен де сен сұлу» әнін жас әнші Мария Галицкая гитарамен сүйемелдеп, нақышына келтіре орындап, халықтың қошеметіне бөленді. Халықаралық байқаулардың лауреаттары Салтанат Байжұманова мен Мәлік Азат «Шынарымды», ал «Низам» квартеті «Ақ маңдайлым» әнін шырқады. Жас болса да халықтың ыстық ықыласына бөленіп, еліміздің намысын халықаралық фестивальдерде қорғап жүрген Димаш Құдайберген «Ақ ерке – Ақжайық» әнін жұртшылыққа тарту етті. Жиналған қауым атақты «Мойынқұмда» әнін «Аюми» тобының орындауында тыңдады.
Аталмыш фестивальде 2010 жылы І-орынды иеленген жас әнші Сержан Жанахметов Шәмші ағаның ұлы Әбілқасым 1,5 жасқа толғанда Жәмила апамызға арнаған «Бақыт құшағында» әнін орындады. Ал, биылғы Бас жүлде иегері – Нұрболат Абдулин «Теріскей» әнін шырқады. Ол өзін кәсіби білімі бар, тәжірибесі мол әнші ретінде танытты. Оркестрге Шәмші Қалдаяқовтың ұлы, Абай атындағы опера және балет театрының дирижері Мұхтар Қалдаяқов дирижерлік етті.
Нұрболат Абдулин, Бас жүлде иегері:
– Жалпы, байқау күндері толғанысты сәттерге толы болды. Осыған дейін Е. Хасанғалиев атындағы «Атамекен» халықаралық конкурсына қатысып, дипломант атанған едім. Бірақ, мен үшін бұл байқаудың орны бөлек. Болашақта Шәмші Қалдаяқовтың тың туындылары жарыққа шыға берсе деп тілеймін.
Сержан Жанахметов, Өзбекстанның жас әншісі:
– Өзім Өзбекстанның азаматы болсам да, ұлтым – қазақ. Бұл байқауға 2010 жылы қатысып, І-орынды иеленген болатынмын. Биылғы гала-концертке арнайы шақырылдым. Өзім Қазақстанға жиі келіп тұрамын. Әр келгенімде Қазақстанның өркендеп, Астана қаласының күн сайын өсіп келе жатқанын көріп шаттыққа кенелемін. Ата-бабаларым Қазақстанда туған, осы кең далада өскен. Сондықтан, мен үшін Қазақстан әрқашан ыстық.
Жәмила Қалдаяқова, Шәмші Қалдаяқовтың жұбайы:
– Сазгерлер мен әншілер үшін 1992 жылдан бері дәстүрлі түрде өтетін Шәмші Қалдаяқов атындағы байқауға биыл жиырма екі жыл толып отыр. Ал, «Менің Қазақстаным» фестивалі, міне, биыл төртінші мәрте ұйымдастырылып отыр. Мәдениет министрлігіне айтар алғысым зор. Себебі, жыл сайын сахна кеңейіп, әсем әрленіп, байқау деңгейі жылдан жылға өсіп, жақсара түсуде. Бүгінгі толқын жастар сахнада әндерді жаңаша түрде орындаса да, кейбір орындаушылар секілді бос айқай мен сахнада орынсыз қылықтарға бой алдырып жатқан жоқ. Сонау 60-ыншы жылдардың жастары сынды сыпайы, ибалы, кішіпейіл, яғни композитордың жан дүниесін түсініп, оны халыққа жеткізе алды.
Ұлтымыздың ұлы композиторының өнегелі өмірі мен өнерін ту еткен, ән падишасы – Шәмші Қалдаяқовтың құрметіне арналған бұл дәстүрлі фестиваль осылайша жыл сайын талай жас таланттарға үлкен сахнаға жол ашып, сазгердің әсем әндерін насихаттауда зор үлес қосып келеді.
Нұрзада КҮМІСБЕК,
Еуразия Ұлттық университетінің студенті.
АСТАНА.
