Президент Жолдауда бірнеше өзекті мәселені көтеріп, атап айтқанда, экологиялық ахуалды реттеудің тетіктерін ұсынды. Бұл орайда елімізде жаңа Экологиялық кодекс әзірленіп, оны жыл соңына дейін қабылдау бойынша Парламентке тапсырма жүктелгенін айта кету керек. Мемлекет басшысының «жасыл» өсімге қатысты барлық бастаманы қолдап, оны енгізудің жолдарын Үкіметке тапсырғаны дұрыс деп есептеймін. Неге десеңіз, экономиканы тек қана шикізатқа негіздеу тиімсіз. Бұл туралы Қасым-Жомарт Тоқаев та айтып, «Жасыл» бағыттағы жобаларды енгізудің маңыздылығына тоқталды. Бүгінде еліміздегі экологиялық жағдай көңіл көншітерліктей емес. Мұны мойындауымыз керек.
Сонымен қоса жаңа Экологиялық кодексте көрсетілгендей, ірі өндіріс орындарын озық қолжетімді технологияларға көшіру жұмыстарын жеделдеткен артық етпейді. Егер де осы бағыттағы тың әдістерді тиімді пайдаланса, «жасыл» экономиканың барлық индикаторы толық жүзеге асырылуы мүмкін.
Пандемия уақытында адамдардың жануарларға жасаған қиянаттары көбейіп кеткені жасырын емес. Осыған қатысты тиісті заң қабылдануы керек. Соның негізінде зарарсыздандырудан бастап, зообақтардың жұмысын жүйелендіру сынды маңызды мәселелерге көңіл бөліну қажет деп санаймын. Мысалы, көршілес Ресейде жануарларға қысым көрсеткен адамдар заң алдында жауап береді. Демек, ол жақтағы халық жауапкершілікті түсінеді. Біздің елімізде де осындай заңнамалық тетіктер қарастырылса, жағымсыз жағдайлар тыйылар еді. Сол секілді экологиялық тәрбие сағатын енгізудің маңыздылығы басым. Тәрбие тал бесіктен басталатынын ескерсек, өскелең ұрпақтың бойына жануарларға деген жанашырлық сезімді сіңіре білуіміз керек.
Елдос АБАҚАНОВ,
«Қазақстанның экологиялық ұйымдары қауымдастығы» ЗТБ төрағасының орынбасары
