Президент Қасым-Жомарт Тоқаев өзінің Жолдауында отандық өнді­ріс пен өнеркәсіп саласын дамы­туға тың серпін керектігін баса айт­ты. Расында да, мемлекет өндіріс­сіз өрге баса алмайды. Осыны жай ғана түсініп қоймай, нақты қадамға баратын кез келді. Әлдеқашан даму жолына түскен алпауыт елдер бұл тетікті негізгі нысан ретінде алға ұстайды. Мемлекет тек қана импортқа тәуелді болған сайын соғұрлым құлдырай береді. Бұл экономиканың бұлжымайтын заңы.

Импорттың экономикаға ықпал етуі­нің оң және теріс әсері бар. Им­порт­­­­тың өсуі елдің төлем балансы­ның ағым­дағы шотының тапшылы­ғын туын­датады, бұл өз кезегін­де ұлт­тық валют­аның бағамына қы­сым жасайды.

Ауыл шаруа­шылығы секторы жү­йелі жолға қойылса, азаматтары­мыз­ды таза әрі қауіпсіз тағаммен қамти аламыз. Бұл бір жағы экономика­ның ілгерілеуіне жол ашатын негізгі бағдар. Осы ретте ғылым мен экономика бір-бірімен тікелей байланыс­та болса ғана дамитын егіз ұғым екенін естен шығармауға тиіспіз. Ғылымға көңіл бөлмей – экономика жоқ. Президент Жолдауында бұл мәселе де тиісті дәрежеде айтылды. Ендігі кезекте соны дұрыс іске асыру мәселесі тұр. Нарықта бәсекесіз өмір сүру мүмкін емес. Әрбір отандық өнім өндіруші бәсекелестер арасын­да үздік болуға талпынуы керек. Өндірістің қазіргі қалыптасып отыр­ған құрылымына байланысты Қазақ­стан экспортының едәуір үлесі шикі­затқа, түсті металдарға, отынға, астық­қа және жартылай фабрикаттарға тиіп отыр. Тек бұларға сүйенуге болмайды. Өзін азық-түлік өнімдерімен, басқа да ең қажетті тауарлармен толық қамти алған мемлекет алға озады. Біз осыған жетуіміз керек

Ораз БАЙМҰРАТ,

ҰҒА академигі