Соңғы бір ай көлемінде аталған бағдарлама жастар арасында қызу талқыланып жатыр. Осы уақыт ішінде азаматтық ұстаным, білім беру, жұмысқа орналастыру, тұрғын үймен қамтамасыз ету және тұлғалық даму сынды 5 негізгі бағыт бойынша 4 мыңнан астам ұсыныс келіп түсті.
Бейнеконференция барысында Jas Otan ЖҚ жетекшісі Елнұр Бейсенбаев бағдарламада көрсетілген тармақтарды іске асыру үшін өңірлік және аумақтық жол карталары әзірленетінін атап өтті.
«Жақын арада талқылау және ұсыныс қабылдау мақсатында барлық жол карталары Jas Otan-ның сайтында (jasotan.kz) жарияланатын болады. Сол себептен де жастар тарапынан біз әлі көптеген ұсыныстар күтеміз», деді ұйым басшысы.
Жас кинорежиссер, сценарист, New York Film Academy түлегі, «Қазақстанның 100 жаңа есімі» жобасының жеңімпазы Айдие Айдарбеков Алматыда жас кинорежиссерлер үшін қала көлемінде көптеген байқау ұйымдастырылатынын атап өтті.
«Бірақ жұмыстың сапалы болуы үшін республикалық кинофестивальдар өткізуді ұсынамын. Сол фестивальдарда жас режиссерлер өз жұмыстарын ұсынып қана қоймай, тәжірибе және пікір алмаса алады», деді жас режиссер.
Бағдарлама жобасында жас ғалымдарға да қатысты бірқатар міндеттер көрініс тапқан. Осы орайда жас ғалым, Қазақстанның Жас ғалымдар альянсының негізін қалаушы және төрағасы, PhD Әсия Ермұхамбетова:
– Менің ойымша, соңғы уақытта ғылыми әзірлемелер мен зерттеулерге емес, стартап-жобаларға да көп көңіл бөлінуде. Жас ғалымдарға арналған байқаулар көптеп ұйымдастырылуы керек деп есептеймін. Сонымен қатар елімізде «Жас ғалым» ұғымы әлі күнге дейін заңды түрде бекітілмеген, сәйкесінше ғылым өкілдеріне қандай да бір жеңілдіктер мен қолдау тетіктері қарастырылмаған. Сонымен қатар әрбір ЖОО қабырғасында студенттердің зерттеу дағдыларын дамыту маңызды, – деді Әсия Ермұхамбетова.
Қорытынды құжат «Жастар – Отанға!» бағдарламасы Jas Otan Жастар қанатының V съезінде қабылданады. Қазіргі уақытта жоба республика бойынша талқылануда.
