ШЫҒЫС ҚАЗАҚСТАН ЖҰРТШЫЛЫҒЫ ШЕКСІЗ РИЗАШЫЛЫҚ БІЛДІРЕДІ

Президент поштасынан Мемлекет басшысы Нұрсұлтан Назарбаевтың атына Шығыс Қа­зақ­стан облысы азаматтарынан алғысқа толы көптеген хаттар келіп түс­ті, деп хабарлады Қазақстан Республикасы Президентінің баспасөз қызметі. “Ауданның елді мекендерінде жол ашу, малға жем-шөп сатып алу үшін қомақты қаржы бөлінді. Ауданға қуатты техникалар келіп, жолдар ашылды. Қиын-қыстау жерлерден жедел дәрігерлік көмекті қажет ететін науқастарды алып кету және қар қыспағында қалған шал­ғай елді мекендерге азық-түлік жет­кізу үшін тікұшақтар ұдайы келіп отырды. Зейнеткерлердің зейнет­ақы­сы, өзге де әлеуметтік төлемдер уақытында беріліп тұрды. Осының арқасында қыстан мал-басымыз аман шықты. Биылғы қыста көр­сеткен қамқорлығыңыз Отаны­мыз­ға, Өзіңізге деген сенімімізді одан әрі нығайта түсті. Қандай қысыл­таяңда болсын ескерусіз қалмайты­нымызға көзіміз жетті. Ол үшін Сізге зор ризашылығымызды жет­кізгіміз келеді”, – деп жазады Шығыс Қазақстан облысы, Күршім ауданы­ның тұрғындары атынан 14 адамның қолы қойылған хатта өңірдің белгілі азаматтары мен еңбеккерлері. Келесі хат көктемгі су тасқы­нынан айрықша зардап шеккен, тұтас ауылдары топан су астында қалып, үйлер қирап, мал опат болған Тарбағатай ауданының тұр­ғындарынан келіпті. “Қиын сәтте Сіздің қамқорлығыңызды сезіндік. Өзіңіздің тікелей тапсырмаңызға орай қазір арнайы комиссия ауданымызда жұмыс істеп жатыр. Мемлекеттен бөлінген материалдық көмекті де ала бастадық. Бүгінде аудандағы жағдай қалыпты дең­гейге түсті. Апаттың зардаптарын жоюға байланысты жоспарлы жұ­мыстар атқарылуда. Балаларымыз­дың ары қарай білім алуды жал­ғастыруына барлық жағдай жасалған. Сондықтан да біз Сізге басы­мызға түскен осы ауыр кезеңде Барқытбел баурайын мекендеген тарбағатайлықтарға жасап отырған қамқорлығыңыз үшін ризашы­лы­ғымызды білдіріп, рахмет айтамыз!” делінген ШҚО-ның Тарбағатай ауданы тұрғындары атынан 11 адам қол қойған хатта. Сондай-ақ Шығыс Қазақстан­ның Зайсан ауданынан келген, 12 адам қол қойған хатта “Табиғаттың сирек кездесетін тосын апатты жағ­дайында, құрметті Нұрсұлтан Әбіш­ұлы, өзіңіздің тапсыр­маңыз­бен ел Үкіметі халыққа көмекке келді. Арнаулы қорлар ашылып, бүкіл респуб­ликаның қолдауы, барша ағайынның назары тасқын судың азабын тартқан жұртқа аударылды. Үйі мүлде тұруға жара­май қалғандарға мемлекет баспана салып беретін болды. Сондықтан апатқа ұшыраған аудан­ның бірі – қадыр-құт дарыған киелі де қа­сиет­­ті Зайсан өңірінің жұрты аты­нан Сізге мың мәрте ризашы­лы­ғы­­мызды, алғыс сезімімізді біл­ді­ре­міз. Құрметті Нұрсұлтан Әбіш­ұлы, өзіңізге жолдаған шынайы алғы­сымызды қабыл алыңыз!” – деп жазады Шілікті ауылдық окру­гі Тасбастау ауылының тұрғындары.