Бәсекелестікке шыдас беретін өнімдерді сыртқы нарыққа жөнелту мүмкіндігін туғызды
Бәсекелестікке шыдас беретін өнімдерді сыртқы нарыққа жөнелту мүмкіндігін туғызды
«Мұнаймаш» АҚ-тың тарихы әріде жатыр. Фашистік Германия еліміздің төріне ентелей ұмтылғанда Петропавл қаласына көшіріп әкелінген таганрогтық «Красный Гидропресс» кәсіпорны негізінде атқарушы механизмдер зауыты құрылды. Осы кезеңде әскерилер үшін арнайы құрал-жабдықтар шығарылса, бейбіт өмір орныққаннан кейін ауыл шаруашылығы саласына бейімделді. Сөйтіп, 1992 жылға дейін КСРО Кемеқұрылысы министрлігі құрамында мұнай-химия, радио, электроникалық және механикалық аспаптар құрастырумен айналысты. Тәуелсіздіктің елең-алаң шағында өнімділік кеміп, қиындыққа кезіккенімен, мемлекеттің қолдауы арқасында қайтадан көш сапына қосылды. Қысқа мерзім ішінде мұнай-газ саласы үшін арнайы құрал-жабдықтар өндіруді меңгерді. Олардың арасында ұңғыма штангалық сорғылар, мұнай-газ жабдықтарының қосалқы бөлшектері үлкен сұранысқа ие. 1998 жылдан «Барлау ӨндіруҚазМұнайГаз» АҚ-пен тығыз әріптестік қарым-қатынас орнатып, батыс өңірлеріндегі кен орындарына мұнай сорғыларын жүйелі жөнелте бастады. 2012 жылы «Қазақстан инжиниринг» ұлттық компаниясымен, «БРК-Лизинг» АҚ-пен бірлесе отырып, «Өнімділік-2020» мемлекеттік бағдарламасы шеңберінде «Механикалық өңдеу өндірісін жаңғырту» жобасын игеруге 1,5 миллиард теңге инвестиция тартылды. Жапониядан, АҚШ-тан және Бразилиядан жоғары үлгідегі «Nakamura Tome», «Hardinqe», «Romi G 50M» токарлық станок қондырғылары орнатылып, өндірістік үдерістерді жобалау мен басқару түгелдей автоматтандырылды. Кәсіпорынның өндірістік қуаты 1,5 есеге ұлғайып, жылына 5 мың данаға дейін мұнай сорғыларын жөнелту мүмкіндігіне ие болды. Өндірістік цикл 80 пайызға, механикалық өңдеу жылдамдығы 5 есеге қысқарды.
– Cоңғы 5 жылдағы техникалық-экономикалық көрсеткіштерімізді талдайтын болсақ, ырғақты дамуымен сипатталады. Атап айтатын болсақ, өнім өндіру көлемі 471 миллион теңгеден 2737 миллион теңгеге, бір еңбеккерге шаққандағы еңбек өнімділігі 4811 теңгеден 22259 теңгеге дейін өсті. Орташа айлық жалақы 124691 теңгені құрайды. Елбасының индустриялық-инновациялық саясаты өндіріске зор серпін беріп, экономиканы үдемелі жаңғырту басты бағдарымызға айналған. Алда өнімдердің қазақстандық үлесін 60 пайызға жеткізу, өнімнің өзіндік құнын 15-20 пайызға кеміту міндеттері тұр, – дейді, кәсіпорынның техникалық директоры Сергей Литвинов.
Осылайша, өндірістік жаңғыртулар өз жемісін беріп келеді. 9 айдың қорытындылары айтарлықтай. Жыл аяғына дейін 3 миллиард теңгенің өнімдерін тұтынушыларға жеткізу ойластырылған. Сонда былтырғыға қарағанда, өнім өндіру қуаты 30 пайызға ұлғаятын болады. «ҚазМұнайГаз» ұлттық компаниясымен ұзақ жылға келісімшарт жасалып, тапсырыстар қабылдау көлемі 1,5 есеге өсті. Бәсекелестікке қабілеттілік бірінші кезекте сапамен айқындалады десек, техникалық сипаттамалары бойынша үздік әлемдік үлгілермен теңесетін мұнай-газ өнімдерін сыртқы нарыққа шығарудың алғашқы қадамдары жасалды. Жоғары технологиялық жаңғыртудан өткен кәсіпорынның алғашқы сатып алушылары Ресейдің мұнай өңдеушілері болып отыр.
Өмір ЕСҚАЛИ,
«Егемен Қазақстан».
Солтүстік Қазақстан облысы
