Алматы, Астана, Өскемен мен Семей қалаларының дүкендерінде саудаланады
Ауылдағы шұжық зауытының атақ-даңқы бұл күндері көпшілікке жақсы таныс. Үржардың шұжығын қазір еліміздегі бірнеше қалалар мен облыс орталығының тұрғындары іздеп жүріп сатып алады десек, артық айтқандық емес. Себебі, бағасы жұрт қалтасы көтерерліктей, оның үстіне дәмі тіл үйіреді.
Алматы, Астана, Өскемен мен Семей қалаларының дүкендерінде саудаланады
Ауылдағы шұжық зауытының атақ-даңқы бұл күндері көпшілікке жақсы таныс. Үржардың шұжығын қазір еліміздегі бірнеше қалалар мен облыс орталығының тұрғындары іздеп жүріп сатып алады десек, артық айтқандық емес. Себебі, бағасы жұрт қалтасы көтерерліктей, оның үстіне дәмі тіл үйіреді.
– «Шваб шұжығы» жауапкершілігі шектеулі серіктестігі 1995 жылы құрылған. Қазір мұнда 80 адам жұмыс істеп, тағамдардың 60-тан астам түрін шығарып жатыр. Мәселен, «Алакөл», «Мұсылман», «Аңшылық» жартылай ысталған шұжықтың бір килограмы 800-1200 теңге тұрады. «Докторлық» шұжықтың бір килограмы 860 теңге ғана. Елбасының Қазақстан халқына Жолдауында ауылшаруашылық өнімдерін шығаруда тың ізденістер болуы қажеттігі атап көрсетілген. Жақында ғана сүт өнімдерінен құрт, ірімшік, басқа да тағамдарды шығарып, Өскемендегі ауылшаруашылық жәрмеңкесіне апарғанымызда, тұтынушылар пышақ үстінен талап әкетті. Үржарда 56 мектеп бар, сауда орындары жүздеп саналады, олар нан-тоқаш тағамдарына тапсырыс беріп жататын. Жақында ғана «Тәтті-дәмді» серіктестігін құрдық, онда 15 адам жұмыс істемек, бұрын тәтті тоқаштар мен тортты Алматыдан тасысақ, енді Үржарда шығаратын болдық, – деп серіктестіктің басшысы Сайлаубек Нұрсиленов кәсіпорынның тыныс-тіршілігімен таныстырып өтті.
Кең цех ішін аралап жүрміз. Технолог Айгүл Шоқанаева мұнда ұзақ жылдан бері еңбек етеді екен. Кәсіпорынның іші таза, қаз-қатар тұрған қыз-келіншектер шұжық тағамдарын жасауда. Тағы бір жаңалық, серіктестік 50 миллион теңгеге арнайы қондырғы сатып алып, «Халал» шұжықтарын шығаруды игеріпті. 30 миллион теңге несие алып, кәсіпорынның қондырғыларын өзгерткен. Айгүл Кәкенқызының айтуынша, күніне үш тоннаға жуық шұжық шығарылады екен. Жыл басынан бері серіктестік 171 тонна шұжық өндірген. Ал мал жақын маңдағы ауылдардан сатып алынады екен.
– «Шваб шұжығы» серіктестігінің басшылары үнемі ізденісте жүреді, қандай бір жаңалықтарға жаны құмар. Шұжық шығару бар да, оны тұтынушыларға сату оңай шаруа емес. Жақында кәсіпорын басшысы Сайлаубек Күсетайұлы маған жолығып, Өскеменде жаңадан ашылған фермерлер орталығынан орын алып, өз өнімдерін сату жөнінде ұсынысын айтты. Бұдан былай, облыс орталығының тұрғындары кәсіпорын бағасымен сатып алу мүмкіндігіне ие болды. Бал құятын қорапшалар да жасалып, Үржардың ағзаға пайдалы тәтті дәмін шығара бастады. Оған да сұраныс жоғары, – деп аудан әкімі Серік Зайнулдин кәсіпорын құлашының кеңге жая бастағанын аңғартты.
Үржардағы шұжық кәсіпорны алдағы уақытта да өз тағамдарымен көпшілікті қуанта бермек.
Оңдасын ЕЛУБАЙ,
«Егемен Қазақстан».
Шығыс Қазақстан облысы,
Үржар ауданы.
