Бас санитарлық дәрігердің қаулысына сәйкес шектеу шаралары жеңілдетіліп, кәсіпкерлік нысандардың жұмыс істеуіне, қоғамдық көліктің қатынауына рұқсат берілді. Бірақ күшейтіл­ген кәсіпкерлік, өзге де салалар­дың нысандарына санитарлық-дезинфекциялық режім талабын сақтау жүктелді. Солай десек те бас мемлекеттік са­­­ни­тарлық дәрігердің мә­лі­метіне сүйенсек, 28 наурыздан 9 қыркүйекке дейін 10 975 жағ­дай тіркелді. Оның ішінде індет белгілері жоқ – 7 685, ко­ронавирус белгілерімен 3 290 науқас тіркелді. Жазылып шық­қандар саны – 10 876 адам. Науқастардың 5 230-ы Атырау қаласында байқалса, Индер ауданында 341, Махамбетте – 231, Құрманғазыда – 166, Мақатта – 281, Қызылқоғада – 426, Исатайда – 245, Жылыой ауданында 4 055 жағдай анық­талды. Ал Теңіз кен орнынан – 2 984, Құлсары қаласынан 1 071 жағдай белгілі болды. Ал кеше, 15 қыркүйекте қауіпті ін­детке шалдыққандар саны 11 015 адамға жетті. Демек, шек­­теу шара­ларын толығымен алып тас­тап, арқаны кеңге салу­дың реті жоқ екені аңғарылып отыр. 

Теңіз кен орны демекші, мұн­дағы қызметкерлердің ден­саулығын қорғау, қауіпсіз­дігін қамтамасыз ету үшін қа­жетті шаралар жалғасып ке­леді. «Теңізшевройл» ЖШС үкі­метпен және жұртшы­лық­пен байланыс бөлімінің бас менеджері Рзабек Артығалиевтің айтуынша, қызметкерлер арасында вирус жұқ­тыру жағдайын анықтау мақсатында оларды уақтылы оқшаулау, ықтимал қарым-қатынаста болғандарды анық­тау үшін ПТР сынамасы алынады. «Теңізшевройл» тарапынан жүргізілген ПТР сынамаларының саны 73 мыңнан асты. Мәселен, 7 қыркүйекке дейін Теңіз кен орнындағы қыз­меткерлер арасында қауіпті індетті жұқ­тырудың 4 147 жағдайы тіркеліп, олардың арасынан 2 295 адам емделіп шықты. Ал тестілеу қорытындысы оң нәтиже бергендердің негізгі бөлігі Теңіз кен орнына вахталық кесте бойынша бара жатқан қызметкерлерден тұрғылықты жерінен ПТР сынамасын алу кезінде анық­талған.

– Пандемия басталғалы бері компанияда санитарлық талаптар толықтай сақталуда. Жұмысшылардың вахтаға бару, үйіне оралуы кезінде ПТР сынамасы міндетті түрде алынады. Қазір Теңіз кен орнындағы инфекциялық стационарда коронавирус симптомымен 35 науқас ем алуда. Пневмонияны жұқ­тырғандар жоқ, – дейді Р.Артығалиев.

Бас менеджердің пікіріне сүйенсек, кен орнында пандемия басталған сәтте 45 мың адам жұмыс істеген. Сәуір айында коронавирус таралуының алдын алу мен жұмысшылардың қауіпсіздігін сақтау мақсаты, сондай-ақ өндірістің тоқтап қалмауы үшін бірінші қажет­тіліктегі емес жұмысқа тар­тылған 27 мың қызметкер Теңіз кен орнынан шығарылды. Содан кейін кеніште «таза» және «лас» аймақтар жасақталып, тамыз айында 17 мыңнан астам адам вахталық жұмысқа қайтадан жұмыл­дырылды. Олар арнайы ПТР тесттен өткізіледі. Эпидемиялық жағдай әбден тұрақтанған соң 45 мыңнан ас­там адам Теңіз кенішіндегі жұмысына қайта кіріседі. Бірақ мұның жаңа жылдан кейін іске асатыны күтіліп отыр. Жұ­мысшыларды қысқарту болмай­ды.

Атырау облыстық бас мем­лекеттік санитарлық дәрігер Асылбек Шаровтың айтуынша, кыркүйектің екінші жартысынан тұмаудың эпидемиялық маусымы басталады. Бұл қысқа мерзімдік емес, келесі жылғы мамырға дейін созылады. Тұмау ауруының алғашқы кезеңі өте жедел өтеді.

– Жасырын инкубация мез­гілі бір-екі күнге созылып, адамның қызуы жоғарылайды. Тұмауға шалдыққан адам тоңған сияқты болып, басы ауырады. Бір мезгілде адамда әлсіздік, ағзасында дел-салдық пай­да болып, басы айналады. Бұлшық еттері ауырады, құ­лағы шулайды. Мұрыннан жиі су ағу байқалады, тамағы қырып жұтындырмайды. Құрғақ қатты жөтел пайда болады. Тұмаудың алғашқы белгілері біліне бастаған кезде ауру адам оқшауланып, көпшілік жиналатын орынға бармауы керек. Жақынына жанашыр болуды ойлаған әр тұрғын осы шектеулерді сақтаса ғана қауіпті індеттің тіркелуі тоқтайды, – дейді А.Шаров.

Оның айтуынша, ауруды алдын алудың бірден-бір жолы – тұмауға қарсы екпе алу. Оны күзде бастаудың тиімділігі зор. Сол себептен Атырау облысына биыл тұмауға қарсы 60 мың дана екпе жеткізілді. Сатып алынған вакцинаны тегін алатындардың тізбесі түзілген. Оған медицина қызметкерлері, медициналық ұйымдарда медициналық бақылауға алынған балалар, алты айдан асқан көп ауыратын балалар, жетім балалар мен ата-анасының қамқорлығынсыз қалған балаларға арналған білім беру ұйымдары мен сәбилер үйлерінің тәрбиеленушілері, медициналық-әлеуметтік меке­мелердің қызметін алушылар, жүктіліктің екінші немесе үшінші триместріндегі жүкті әйелдер, жүрек-қан ­та­мыр жүйесінің, тыныс алу мүшелерінің созылмалы ауруы­на шалдыққандар жатады.

Жақында облыстық денсау­лық сақтау басқарма­сының басшысы Нұрлыбек Қабдықапаров Құрманғазы ауданына арнайы дәрігерлер бригадасын ертіп барды. Бригада құрамында невропатолог, хирург-ортопед, ЛОР, кардиолог, окулист, фтизиатрлар бар. Олар аудан аумағындағы бірнеше елді мекенде 358 адамды қабылдап, медициналық кеңес берді. Ме­дицина қызметкерлерімен кездесуде пандемиямен күреске жұмылдырылған медицина мамандарына үстемеақы, өтемақы төлеу мәселесіне, ав­токөлікпен қамту, коронавирус инфекциясының екінші толқынына дайындық жайы кеңірек талқыланды.

– Қазір аудандық орталық ауруханада оттегі стансасы салынып жатыр. Стансада оттегінің үздіксіз өндірілуі қам­тамасыз етіледі. Бұл оттегі баллондарын тасымалдауды жою үшін қолға алынды. Қазір аудандағы денсаулық сақтау мекемелерінде жеке қорғаныш заттары, дәрі-дәрмек қоры жеткілікті. Азғыр ауылындағы дәрігерлік пунктке үш оттегі концентраторын әкеліп бердік, – дейді басқарма басшысы Н.Қабдықапаров.

Атырау облысы