Істе іркіліс болмауы тиіс

Аймақтар • 17 Қыркүйек, 2020

Істе іркіліс болмауы тиіс

57 рет көрсетілді

Ғаламдық жылынудың әсерінен бе, соңғы жылдары мұнайлы өңірде қыс қаһары соншалықты байқалмай жүр. Бірақ алдағы қыстың қалай боларын кім болжай алар дейсің? Сол себептен облыс әкімдігінің қаулысымен «Атырау облысының аумағында 2020-2021 жылдардың күзгі-қысқы кезеңінде нысандардың жұмысқа дайындығы туралы» облыстық ведомствоаралық комиссия құрылды.

Жолдасбек КӨШЕРБАЙҰЛЫ

Аталған комиссия коммуналдық қызметтердің қысқы маусымға дайындығы мен «Мақат-Солтүстік Кавказ» магистральды газ құбырындағы ағымдық жөндеу жұмысына баса назар аударып отыр.

Облыс әкімінің бірінші орынбасары жетекшілік ететін ведомствоаралық комиссия нақты атқарылатын іс-шаралардың жоспарын бекітіп, орындалуын қадағалауға алды. Жылу беру маусымына дайындық жұмысын жүргізу үшін 5,7 млрд теңге бөлінді. Қолдағы дерекке қарағанда, Атырау қаласында көппәтерлі 1 737 тұрғын үй, 409 білім беру, 147 денсаулық сақтау нысаны бар.

Пәтер иелерінің кооперативтері мен коммуналдық мекемелердің бірлескен жұмысының нәтижесінде 1 402 тұрғын үй, 392 білім беру және 135 денсаулық сақтау нысаны гидравликалық сынақтан өткізілді. Бірақ әлі де коммуналдық кәсіпорындар жылу беру маусымына дайындық шараларын толық аяқтай қойған жоқ. Өйткені 19,6 шақырымдық жылумен қамтитын желінің 11,4 шақырымына, 781,19 шақырымға созылған электр желілерінің 679,47 шақырымына, 3,08 шақырым су және кәріз жүйесіндегі желілердің 2,3 шақырымына ғана ағымдағы жөндеу жұмыстары жүргізілді. Десек те, коммуналдық саладағы кәсіпорындардың басшылары бір айға жетпейтін мерзімнен кейін басталатын жылу беру маусымына сақадай сай боламыз дегенді ұстанып отыр.

Қысқа әзірлік басталысымен әсіресе ыстық су беру жиі тоқтайды. Мұның бірнеше себебі бар. «Атырау жылу электр орталығы» АҚ мамандарының түсіндіруінше, біріншіден, құбыр желісін жөндеу кезінде тұрба ауыстырылады. Екіншіден, гидравликалық сынақ жүргізіледі. Кейде осындай жөндеу жұмыстары бірер аптада аяқталса, Атырау қаласының «Тұрғын үй қалашығы», «Нұрсая» шағын аудандарында бір айға жуық мерзімге созылды. Тұрғындарға жаздың аптабы болса да, осынша уақыт ыстық сусыз отыруына тура келді. Енді міне, Атырау қаласында 16-27 қыркүйекте ыстық су беру тағы да тоқтатылмақ.

Мұндай іркіліс табиғи газ желісінде де байқалады. Мәселен, «Интергаз Орталық Азия» АҚ-тың магистральды газ құбырына жоспарлы жөндеу жүргізілді. Соның ішінде «Мақат – Солтүстік Кавказ» магистральды газ құбырындағы жөндеу жұмыстарын жүргізу кезінде, нақтырақ айтқанда, 1-7 қыркүйекте Мақат ауданының Доссор кентінде, ал 8-11 қыркүйек аралығында Атырау қаласының сол жақ жағалауындағы тұрғын үйлер мен кәсіпорындарға газ беру тоқтатылды.

Өңірдегі қысқы маусымға әзірлік кезінде көрініс табатын мұндай жайт жыл сайын қайталанып тұрады. Сол себептен Атырау қаласының, іргелес елді мекендер мен Махамбет ауданына қарасты Алға, Ортақшыл, Есбол, Ақжайық, Еңбекшіл ауылдарының тұрғындары да аз күн табиғи газсыз отыруға түсіністікпен қарап келеді. Әрине «көгілдір отын» тоқтатылған кезде тұтынушылар электр қуатын әдеттегіден көбірек тұтынары даусыз. Сондықтан «Атырау жылу электр орталығы» АҚ электр энергиясымен үздіксіз қамту үшін мазут отынын жағуға мәжбүр болды.

Атырау облысы