• 03 Қараша, 2013

Кәсіпқой бокс: Геннадий Головкин жеңіске жетті (ВИДЕО)

316 рет

көрсетілді

1 мин

оқу үшін

Egemen Qazaqstan

03-11-13-golovkin-stivens-1

Қазанның 3-і күні АҚШ-тың Нью-Йорк қаласындағы атақты «Мэдисон сквер гарден» спорт кешенінде Бүкіләлемдік бокс ассоциациясының нұсқасы бойынша 72,6 килоға дейінгі салмақта өзінің атағын тоғызыншы мәрте америкалық Кертис Стивенспен шайқаста қорғаған қазақстандық Геннадий Головкин 8-раундта жеңіске жетті. Сөйтіп, біздің жерлесіміз 12 раундтан тұратын жекпе-жекті ақырына дейін жеткізбей, оны өз пайдасына шеше білді. Ол осымен биылғы жылы өткізген 4 шайқасының бәрін де жеңіспен аяқтады. Осы айқастың алдында ғана Гена мүмкіндігі болғанынша қарсыласын ұрып құлатып, нокаутпен жеңуге ұмтылатынын мәлімдеген еді. Сайыпқыран жігітіміз сол дегеніне жетті. Ол қарсыласын ұрып құлатпағанымен, сегізінші раундта америкалықтың жаттықтырушылар штабы ұрысты аяқтауға шешім қабылдап, ортаға ақ орамал тастады. Техникалық нокаут! Ал шайқастың барысы бәрібір Генаның жеңетінін байқатқандай болатын. Оның үстіне жетінші раундтан бастап Стивенстің бір көзі жұмылып, ашылмай қалды. Қазақстандық боксшы жекпе-жектің басынан оның тізгінін өз қолында ұстады. Ол барлық раундтарда бәсекелесінен басым түсіп отырды. Біз Кертистің тек төртінші раундтың соңында белсене қимылдағанын көрдік. Қалған уақыттардың бәрінде Генаның ауыр соққылары оның басы мен көзіне, бауыры мен бүйіріне дембіл-дембіл тиіп тұрды. Бұл шайқасы үшін Геннадий 400 мың долларға қол жеткізетін болса, Стивенске 290 мың доллар беріледі. Ал жеңіс құтты болсын, ағайын! Руслан Игілік. {youtube}I3aSU_fE2p4 {/youtube}