Кеше Орталық коммуникациялар қызметінің ресми өкілі Алтай Әбибуллаев өткізген дәстүрлі брифингте ағымдағы аптаға жоспарланған негізгі шаралар хабарланды.
Кеше Орталық коммуникациялар қызметінің ресми өкілі Алтай Әбибуллаев өткізген дәстүрлі брифингте ағымдағы аптаға жоспарланған негізгі шаралар хабарланды.
Атап айтар болсақ, аптаның басты іс-шарасы 10-11 қарашада Ресейдің Екатеринбург қаласында өтетін Қазақстан мен Ресей арасындағы аймақаралық форум болғалы отыр. Оған екі елдің Президенттері қатысады деп жоспарланған. Осы аптаның еншісіндегі тағы бір айтулы шара – 5-11 қараша аралығында Қытай Халық Республикасында өтетін Қазақстанның Мәдени күндері. Сонымен қатар, 6 қарашада Бейжіңде Қазақстан Республикасының Мәдениет және ақпарат министрі Мұхтар Құл-Мұхаммедтің қатысуымен екі ел арасындағы мәдени-гуманитарлық ынтымақтастық жөніндегі кіші комитеттің 9-шы отырысын өткізу жоспарланған.
Ал 6-7 қарашада Алматыда Медициналық-санитарлық алғашқы көмек жөніндегі Дүниежүзілік денсаулық сақтау ұйымы – Біріккен ұлттар ұйымының Балалар қоры – ЮНИСЕФ-тің Алматы декларациясының 35 жылдығына арналған халықаралық конференциясы өтеді. 7 қарашада Астанада Премьер-Министрдің орынбасары – Индустрия және жаңа технологиялар министрі Әсет Исекешевтің қатысуымен «Геологиялық сала және жер қойнауын пайдалану саласы дамуының перспективалары мен негізгі бағыттары» тақырыбында дөңгелек үстел өткізу жоспарланған.
Осы күні, сондай-ақ, Астанада «Жаңа Жібек жолы» II халықаралық көлік-логистикалық бизнес-форумы өтеді. Онымен қоса, дәл осы күні «Астана Экспо-2017» ҰК» АҚ-та Премьер-Министр Серік Ахметов ЭКСПО-2017 Халықаралық мамандандырылған көрмесінің дайындығы мен өткізу жөніндегі Мемлекеттік комиссияның көшпелі отырысын өткізеді. Ал Мәжілісте «Астана ЭКСПО-2017» Халықаралық мамандандырылған көрмесін ұйымдастыру және өткізу мәселелері жөніндегі кейбір заңнамалық актілерге өзгерістер мен толықтырулар енгізу туралы» заң жобасының таныстырылымы өтеді.
«Егемен-ақпарат».