– Кішкентайларынан теледидарда көрсетілетін түрлі мультфильм кейіпкерлерін үйдің қабырғасына салатын. Содан үйдің қабырғалары кейіпкерлерге тола бастады. Басында қыздарыма ренжідім. Кейіннен олардың бойындағы таланттарын байқадым. Өйткені, салынған суреттер тура мультфильмдегіден айнымайтын. Кейін қыздарымның бұл қабілеттерін мектеп мұғалімдері байқап, талаптарын әрі қарай шыңдауға күш жұмсады. Әсіресе мектептің көркем еңбек пәнінің мұғалімі Шынар Жеңісқызы көп көмек көрсетті, дейді қыздардың анасы Жүзбаева Қамажай.
Ал ұстаз Шынар Жеңісқызының айтуынша, Әлия мен Әсия түрлі жанрда сурет салады. Анимациялық, портрет, шыныға сурет салу, көшірме сурет, тарихи, тұрмыстық бағыттағы суреттерді қағаз бетіне түсіреді.
– Әлияға бірде облыстық жарыста жеребе суырғанда өзіне таныс емес комикс жанры түсті. Қазақтың батырларларының бейнесін аңыз бойынша бедерлеу керек. Берілген уақыт ішінде «Керқұла атты Кендебай» ертегісін бір қағаздың бетіне он бес суретпен бейнелеп шығып, екінші орынды иеленді. Осылайша өзіне таныс тақырып болмаса да еш қаймықпастан жарысқа қатысқан 15 оқушының ішінен суырылып алға шықты, – дейді ол.
Оқушының қабілетін танып, тәрбиелей білген ауыл ұстазы қос суретші шәкіртін алысқа ұшырды. Олардың болашағына үлкен үмітпен қараған оның енді ауылдағы өзге де талантты балалардың қанатын қатайтып, томағасын сыпыруға себі тиеді деп ойлаймыз.
Маңғыстау облысы
