Елордадағы Ұлттық академиялық кітапханада Мәдениет және ақпарат министрлігінің Тіл комитеті 2011-2020 жылдарға арналған мемлекеттік бағдарламаны іске асыру жөніндегі іс-шаралар жоспарына сәйкес «Мектеп бағдарламасына енген қазақ әдебиетінің және қазақ тіліне аударылған әлем әдебиеті классиктерінің аудиохрестоматиясының» тұсаукесер рәсімін өткізді.
Елордадағы Ұлттық академиялық кітапханада Мәдениет және ақпарат министрлігінің Тіл комитеті 2011-2020 жылдарға арналған мемлекеттік бағдарламаны іске асыру жөніндегі іс-шаралар жоспарына сәйкес «Мектеп бағдарламасына енген қазақ әдебиетінің және қазақ тіліне аударылған әлем әдебиеті классиктерінің аудиохрестоматиясының» тұсаукесер рәсімін өткізді.
Ақпараттық кеңістікте мемлекеттік тілдің қолдану аясын кеңейту, қазақ және әлем әдебиеті өкілдерінің шығармаларының көпшілікке қолжетімділігін насихаттау және оқырман қауымға аудиохрестоматияның әзірленгені туралы бұқаралық ақпарат құралдары арқылы кеңінен хабар тарату үдерісінде ұйымдастырылған іс-шараға Мәдениет және ақпарат министрлігінің басшылары, қоғам қайраткерлері, ақын-жазушылар мен жобаны жүзеге асыруға жауапты қызметкерлер қатысты.
Жобаның мақсаты – оқырманның тіл мәдениетін жетілдіруді, қазақ халқының әдеби мұралары туралы жүйелі түсінік беруді және әлем әдебиеті үлгілерімен таныстыруды, ізгілік, адамгершілік, әсемдік, отансүйгіштік және іскерлік құндылықтарды жас ұрпақтың бойына сіңіруді көздейді. Сондай-ақ, жастарды, әсіресе, мектеп оқушыларын интернет көздері арқылы көркем шығармалардың аудионұсқасын өз бетінше іздеп, қызығып оқуға дағдыландыру болып табылады. Негізінде аудиохрестоматия мектеп жасындағы балаларға, ата-аналарға, сондай-ақ, қазақ тілі мен әдебиеті мұғалімдері мен жалпы көпшілік қауымға арналып, жоба Тіл комитетінің til.gov.kz сайтында орналастырылыпты.
Басқосуда сөз алған Мәдениет және ақпарат министрлігі Тіл комитетінің төрағасы Мақсат Сқақов жүзеге асырылып отырған іс-шараның маңыздылығына тоқталып өтсе, белгілі қаламгерлер Әкім Тарази мен Төлен Әбдік тіл мәселесіндегі түйткілдерді тілге тиек ете келе, қолға алынған игілікті іске ризашылық білдіріп, сәттілік тіледі. Еліміздің еңбек сіңірген әртісі Сауық Жақанова, ғалымдар Серік Негимов пен Қайрат Сақ, жазушылар Бақытжан Тобаяқов пен Сәдібек Түгел, Білім және ғылым министрлігінің өкілі Роза Баттал мен Астана қалалық №51 мектеп-гимназиясының директоры Күнімхан Дүйсеновалар атқарылған ауқымды істің мән-мағынасын атап өтіп, өз ой-пікірлерін ортаға салды.
Берік САДЫР,
«Егемен Қазақстан».
