Қалалық оқу бөлімінің басшысы Жазира Хамзабаеваның мәліметінше, осы мақсатта барлық кәсіпорын басшыларына, жеке кәсіпкерлерге, банктерге, басқа да ұйымдарға «Мектепке жол» шарасына қатысуға шақырған хаттар жолданды. Алдымен МАЭС-1 кәсіпорны шақыруға үн қосып, қаладағы №11, №9 мектептердің 100 оқушысына сабаққа қажетті дәптерлер, басқа да қажетті заттар мен сөмкелер сыйлады. Мектептерге интернет желісін қосып берді. Екібастұздың екінші стансасы МАЭС-2 де шақыруға үн қосып, №28 мектептің 15 оқушысын оқу жылына керекті заттармен қамтамасыз етті.
Ал «Халық банкі» АҚ қалалық бөлімшесі қалаға қарасты ауыл мектептерінің 1-сыныбына барған 25 оқушыға кеңсе тауарлары, сөмкелер табыс етті.
Өңірдегі алып өндірістер орналасқан Ақсу қаласы мен қалаға қарасты 32-ауылға да қайырымдылық шарасының шарапаты жетті. Қалалық білім бөлімінің мәліметінше, былтыр осы уақытта әлеуметтік тұрмыс деңгейі төмен отбасылардың 2 531 баласы «Мектепке жол» қайырымдылық шарасы барысында көмек алса, биыл да қала мен қала аумағында тұратын 2 мың оқушыға демеушілік көмек көрсету жалғасуда. Бұл шақыруға қаладағы «Ақсу ферроқорытпа зауыты» АҚ, «Еуразиялық энергетикалық корпорациясы» АҚ сияқты алып кәсіпорындар жылдағыдай үлес қосуда.
Сонымен бірге Майқайың кентінде орналасқан «Майқайың алтын» АҚ кәсіпорны да кенттегі №2 мектептің оқушыларына 10 ноутбук алып берді. Мектеп басшылығы кәсіпорын көмегіне жүгініп, тағы 19 планшетке өтініш беріпті.
Облыс орталығына қарасты Кенжекөл аулындағы «Отбасылық үлгідегі балалар аулының» тәрбиеленушілеріне «Үміт үзбеу» қоғамдық қорының мүшелері «Жетекші» жобасы аясында 10 ноутбук, 6 смартфон алып берді. Телефон нөмірлерін, интернеттік айлық тарифін балалар аулындағы жетекшілер төлейді.
Демеушілер, жеке кәсіпкерлер, басқа да қайырымдылық жасаушы жандар қадағалаушы орындардан балаларға берілетін ноутбуктер, смартфондар, планшеттер, дәптер, қалам, сөмке, басқа да құралдар толы өздері сыйлаған базарлықтың жол ортада жоғалып кетпей, арнайы тізім бойынша әлеуметтік аз қамтамасыз етілген отбасылардың ұл-қыздарына, жетім балаларға ғана берілуін сұрайды. Өйткені облыстық білім басқармасының мәліметінше, биыл қашықтан оқыту форматын ұйымдастыру үшін демеушілерден басқа, республикалық бюджеттен 15 923 компьютерлік техника (компьютер – 1 657, ноутбук – 12 119, планшет – 2 147) сатып алуға 2,4 млрд теңге қаражат бөлінді. Сондықтан қаптаған ноутбук, компьютерлік техника, планшеттердің сайда саны, құмда ізі жоғалып кетпесін деген күдік де мазаламай қоймайды. Бұл ретте техникаларды сатып алудың ашықтығын қамтамасыз ету үшін басқарма «Адалдық алаңы» жобалық кеңсесінің басшысы Р.Исабековтің басшылығымен мониторингтік жұмыс тобын құрды.
Компьютерлік жабдық өнім берушілерін таңдау осы жұмыс тобының ұсыныстарына сәйкес жүзеге асырылып, өңірге
1 657 бірлік дербес компьютер жеткізілді. Бұған дейін өңірде тұратын 12 304 оқушының үйінде компьютерлік техника болмағаны анықталды. Енді 10 қазанға дейін тағы 14 266 техника (12 119 ноутбук, 2 147 планшет) жеткізілмек. Барлық сатып алынатын компьютерлік техника мұқтаж отбасыларға тек уақытша пайдалануға беріледі.
Әрине, келген базарлықтың барлығы орын-орнымен игілікке жұмсалса қуаныш. Бәрі де балалардың болашағы, қуанышы үшін ғой. Тағы да бір жағымды жаңалық: Екібастұзда ANSA SILICON компаниясының өкілдері оқушыларға оқу үшін қажетті бағдарламалық қамтамасыз етілген ноутбуктерді табыс етті. Қайырымдылық шарасы №26 мектеп-гимназиясында, №25 қазақ қыздар гимназиясында, №24 мектеп-гимназиясында өтті. Ноутбуктер материалдық жағдайына байланысты қымбат компьютерлік техниканы сатып алуға мүмкіндігі жоқ отбасыларға берілді. Балалар қашықтан оқитын кезеңде сыйлықтар өте пайдалы болды.
– Мұндай сыйлық туралы армандаған жоқпыз, – деді Айдана Смағұлова. – Біздің отбасымыз үшін бұл үлкен көмек. Ноутбук арқылы балаларға сабақ оқу оңайырақ болады.
Ноутбук алған 8-сынып оқушысы Аслан Керейбек IT маманы болуды армандайды. Болашақ бағдарламашы апасы мен атасының қамқорлығында.
– Мен зейнеткермін. Зейнетақым аз, екі баланы тәрбиелеп отырғандықтан, осындай қымбат затты сатып алу қиынға соғады. Біз сыйлықты ризашылықпен қабылдаймыз. Немерелерімнің қашықтан оқуына мүмкіндік туды, – деді демеушілерге Асланның атасы.
Павлодар облысы
