Оларға қоғамның бір мүшесі ретінде қарап өз қабілеттерін ұштауға, бойында бар өнерін шыңдауға, сондай-ақ өнерін, білімін дамытып, ғылыми жұмыспен айналысып, арнайы патент алуға, өзі қалаған мамандықтың иесі болуға қол жеткізуіне, жұмыс жасап қаражат табуына және араларында әртүрлі жағдайлар орын алғанның өзінде егер қаласа отбасы мүшелерімен кездестіріп, татуластыруға барлық мүмкіндіктер жасалуда. Өйткені өмір әркімнің өзі қалағандай бола бермейді, ойламаған жерден жолдан тайып, жаза басу әбден мүмкін. Тіпті алдына үлкен арман мен мақсат қойып, бір-ақ рет берілетін өмірді мазмұнды істерге арнаймын деген таудай талапты жанның өзі қас-қағым сәттегі бір ғана әрекетімен қиялындағы әдемі тірлігін түрмедегі жұпыны тағдырға ауыстырып алуы таңғаларлық емес.
Әрине, түрменің аты түрме, оның өз әлемі бар. Бірақ жазасын өтеушілердің мұқалмаған рухына, жақсы келешекке деген ұмтылысына қарап бір жылымықты сезгендей боласың. Ал олардың жанталаса еңбек етіп ақша тауып, өз қолдарымен алуан түрлі дүниелерді – тұрмыстық бұйымдар мен ағаштан жасалған өзге де нәрселерді жасап шығарып, оны қажетті орындарға бергендеріне риза боласың. Бірін бірі толықтырған дүние-ай дейсің іштей!
Елімізде көктем, жаз айларында індет қаһарына мінген шақта темір тордың арғы бетіндегілер қоғамнан оқшауланып қалған жоқ, елмен бірге қиналып, халыққа көмек қолын созуға жанұшыра ұмтылды.
ІІМ Қылмыстық-атқару жүйесі комитеті Маңғыстау облысы бойынша департаментіне қарасты ГМ 172/6 түзеу мекемесінде құрылған шағын цех ауыр шақта дәрігерлерге, өзге де тапсырыс бергендерге арналған қорғаныш киімдерін, бетперделерді тігуге жұмылды. Қолдан пішілген сапасы санитарлық талаптарға сай қорғаныш киімдерін тігумен «Рамит-Ақтау» ЖШС мен «Еңбек-Атырау» мекемесіндегі 32 жазасын өтеуші айналысып, аз уақыт ішінде 50 мың бірреттік қолданысқа жарамды қорғаныш киімдерін, 60 мың бетперде тігіп, сондай-ақ 4 дезинфекциялық тоннел дайындап шығарды. Белсенді еңбек еткен азаматтардың үлесі елеусіз қалған жоқ – олар аймақ басшысы атынан алғыс хаттармен марапатталды, ал ең бастысы – олардың үлгілі тәртібі мен үздік ісі мерзімінен бұрын босап шығуы үшін арнайы орындар тарапынан есепке алынатын болады.
Қазіргі таңда Маңғыстау облысы Қылмыстық-атқару жүйесі департаменті ГМ-172/6 мекемесі аумағында жеке кәсіпкерлердің төрт цехы және «Еңбек-Атырау» мемлекеттік мекемесі орналасқан. Бұл кәсіпорындарда 111 сотталушы еңбек етіп, жалақы алады. Олар жалақыларының бір бөлігін міндетті талаптарына сай төлемге пайдаланса, екінші бөлігін өздерінің жеке қажеттіліктеріне жұмсайды.
Жуырда Ақтаудағы аталған зона қызметкерлері тағы бір үлгілі ісімен танылды. Олар мекеме басшылығына өздері өндірген бұйымдарды қайтарымсыз тұрғыда қаладағы әлеуметтік мекемелерге беруге ұсыныс білдірген. Жазасын өтеушілердің бұл ұсынысы сотталушылармен арадағы еңбек келісімшартын, сондай-ақ цех ашқан кәсіпкердің құқын бұзбай жүзеге асырылады.
– Жазасын өтеу кезіндегі еңбек – сотталушыларды тәрбиелеудің маңызды бөлігі. Сондықтан біз басшылыққа осы тұрғыдағы ұсыныспен шыққан сотталушыларды әрдайым қолдауға дайынбыз. Мұндай акциялар біздің бірлескен жұмысымыздың көрсеткіші болмақ, – дейді Маңғыстау облысы бойынша ҚАЖД бастығының орынбасары Қанат Жарылғапов.
Сотталушылардың қолынан шыққан ағаштан жасалған ас салатын табақтар мен астаулар, оқтаулар, қарт кісілерге және мүгедек жандарға арналған балдақтар, күнделікті тұрмысқа қажетті өзге де көздің жауын алатын әсем бұйымдардың бір бөлігі Ақтау қаласындағы №2 арнайы әлеуметтік көмек көрсету орталығына табысталды. Енді жазасын өтеушілердің қолынан шыққан бұйымдардың пайдасын аталған мекеме қарауындағы қарт кісілер мен мүгедектер көретін болады.
«Жаңылмайтын жақ, сүрінбейтін тұяқ жоқ» дегендей, бас бостандығы шектеліп, темір тордың арғы жағына тоғытылғандар арасында бос уақытында кітап оқып, қоғамға да, өзіне де пайдалы іспен айналысуды, саламатты өмір салтын ұстануды берік қағида еткен жазасын өтеуші жан – шалыс басқан қадамын қайта түзеуге ниетті жан деп қабылдауға болады. Қайта тәрбиелеу жұмыстары – әрбір сотталушының рухани күйзеліспен жақсылықтан түңіліп, өзін құрдымға лақтыруын болдырмау үшін түрме басшылығынан зор табандылықты, үлкен ұйымдастырушылықты, маңызды міндеттер мен жарқын жобаларды, тың бастамаларды талап етеді. Түрмедегі жылт еткен жаңалық пен жақсы хабар – осы тұрғыдағы мазмұнды істердің көрінісі.
Маңғыстау облысы
